इन्टरनेशनल वुमन्स च्याम्पियनसिप : नेपाल आज लेबनानसँग भिड्दै

इन्टरनेशनल वुमन्स च्याम्पियनसिप अन्तर्गत नेपालले आज आफ्नो दोस्रो खेलमा लेबनानसँग प्रतिस्पर्धा गर्दैछ। त्रिपुरेश्वरस्थित दशरथ रंगशालामा खेल साँझ ६ बजे सुरु हुनेछ।

यसअघि दिउँसो २ बजे म्यानमार र कीर्गिस्तानबीच पहिलो खेल हुनेछ। प्रतियोगितामा रहेका चार टोलीको यो दोस्रो खेल हो। पहिलो खेलमा म्यानमारले लेबनानलाई ३-१ ले तथा नेपालले कीर्गिस्तानलाई १-० ले पराजित गर्दै सुखद सुरुवात गरेका थिए।

आजको खेल जित्दै नेपाल फाइनल यात्रा सुनिश्चित गर्न चाहन्छ। मुख्य प्रशिक्षक राजेन्द्र तामाङले पनि लेबनानविरुद्ध जितकै लागि खेल्ने बताएका छन्।

नेपालका लागि पहिलो खेलमा विमला चौधरीको एक मात्र गोल निर्णायक बनेको थियो, तर फिनिसिङमा कमजोरी देखिएको थियो। आजको खेलमा त्यसलाई सुधार्ने नेपालले अपेक्षा राखेको छ।

लेबनानका प्रशिक्षक वेल घार्जेदिनले पहिलो खेलमा पराजय भोगेपछि केही परिवर्तन गर्ने संकेत दिएका छन्। सोमबार मात्रै काठमाडौं आइपुगेका लेबनानका तीन खेलाडी आजको खेलमा सहभागी हुन सक्ने अनुमान गरिएको छ।

नेपाल र लेबनान यसअघि एक पटकमात्र भिडेका थिए। गत वर्ष वाफ च्याम्पियनसिपको सेमिफाइनलमा नेपालले २-१ को जित निकाल्दै फाइनलमा स्थान बनाएको थियो।

आजको खेल नेपालका लागि महत्वपूर्ण मानिएको छ। लगातार दोस्रो जित हात पार्दै टोली सेमिफाइनल पुग्न चाहन्छ।