पहिले सूचना लुकाउँदा अहिले बर्डफ्लुको जोखिम

 काठमाडौं । ललितपुरस्थित सदर चिडियाखानामा बर्डफ्लु संक्रमण फैलिएको विषय समयमै सार्वजनिक नगरिएको आरोपपछि राष्ट्रिय प्रकृति संरक्षण कोषले चिडियाखानाका प्रमुख सत्यनारायण साहलाई जिम्मेवारीबाट हटाउँदै घटनाबारे औपचारिक छानबिन सुरु गरेको छ।

पशु सेवा विभागका अनुसार चिडियाखानाभित्र रहेका चराचुरुंगीहरू जेठ २९ गतेदेखि मर्न थालेका थिए। अवस्था गम्भीर बन्दै जाँदा पनि समयमै सम्बन्धित निकायलाई जानकारी नदिइएको प्रारम्भिक निष्कर्ष निकालिएको छ। असार १ गते मृत चराको नमुना परीक्षणका लागि पठाइएपछि ‘हाइली प्याथोजेनिक एभियन इन्फ्लुएन्जा (एच५एन१)’ अर्थात् बर्डफ्लु संक्रमण पुष्टि भएको थियो।

संक्रमण पुष्टि भएपछि असार ५ गतेदेखि चिडियाखाना बन्द गरी पूर्ण रूपमा सिल गरिएको छ। हालसम्म ३७ पशुपन्छी मरेका छन् भने २४ वटामा संक्रमण पुष्टि भएको जनाइएको छ। लोपोन्मुख र दुर्लभ प्रजातिका पन्छीसहित केही साना स्तनधारी जनावर पनि प्रभावित भएका छन्।

विज्ञहरूले प्रारम्भिक पहिचान, सूचना पारदर्शिता र कडा जैविक सुरक्षा अपनाउन ढिलाइ हुँदा जोखिम बढ्ने चेतावनी दिएका छन्। घटनाबारे विस्तृत छानबिन जारी रहेको कोषले जनाएको छ।