गाई तस्करीको प्रयास: ७ गाईसहित दुई जना पक्राउ

रौतहट प्रहरीले ७ वटा गाईसहित दुई जनालाई पक्राउ गरेको छ। अवैध रूपमा गाई र बाछा लैजान खोज्ने कार्यमा संलग्न रहेको सूचनाका आधारमा अस्थायी प्रहरी पोष्ट बमनहरबाट खटिएको प्रहरी टोलीले उनीहरूलाई नियन्त्रणमा लिएको हो।

पक्राउ पर्नेमा राजपुर नगरपालिका वडा नं. २ फतुवाका ४३ वर्षीय ओहिद अन्सारी र यमुनामाई गाउँपालिका वडा नं. ३ का २८ वर्षीय शेख सोहेब आलम रहेका छन्।

जिल्ला प्रहरी कार्यालय रौतहटका सूचना अधिकारी दीपककुमार रायका अनुसार, अवैध रूपमा गाई र बाछो लैजाँदै गर्दा उनीहरूलाई फतुवाबाट पक्राउ गरिएको हो। पक्राउ परेका गाईलाई आवश्यक प्रक्रिया पूरा गर्न गौर भन्सार कार्यालयमा बुझाइएको छ।

यस घटनामा संलग्न व्यक्तिहरूमाथि आवश्यक अनुसन्धान भइरहेको जिल्ला प्रहरी कार्यालय रौतहटले जानकारी दिएको छ। प्रहरीले गाईको अवैध ओसारपसार रोक्न कडा कदम चाल्ने प्रतिबद्धता व्यक्त गरेको छ।

अवैध गतिविधि रोक्न प्रहरी सक्रिय रहेको र कानुन अनुसार कारबाही गरिने प्रहरीको भनाइ छ।