आज जनयुद्ध दिवस मनाइँदै, कर्णालीका ३ स्थानीय तहमा सार्वजनिक विदा

जनयुद्धको नेतृत्वकर्ता नेकपा (माओवादी केन्द्र) ले आज फागुन १ गतेलाई जनयुद्ध दिवसको रूपमा मनाउँदैछ। पार्टीले केन्द्रीय कार्यालयमा विशेष कार्यक्रम आयोजना गरी जनयुद्ध दिवसको सम्झना गरिरहेको छ। वि.सं. २०५२ फागुन १ गतेबाट सुरु भएको जनयुद्धले नेपालमा राजनीतिक परिवर्तनको जग बसाल्दै गणतन्त्र, संघीयता, समावेशी लोकतन्त्र र सामाजिक न्यायका ठूला उपलब्धिहरूलाई स्थापित गराएको इतिहास छ।

जनयुद्ध दिवसको अवसरमा कर्णाली प्रदेशका केही स्थानीय तहहरूले सार्वजनिक विदाको घोषणा गरेका छन्। जुम्लाको सिंजा गाउँपालिका, रुकुम पश्चिमको चौरजहारी नगरपालिका र कालीकोटको पलाता गाउँपालिकाले आज सार्वजनिक विदा दिने निर्णय गरेका हुन्।

भने कालीकोटकै महावै, शुभकालिका गाउँपालिका र रास्कोट नगरपालिकाले भने जनयुद्ध दिवसका अवसरमा विशेष कार्यक्रम आयोजना गर्ने तयारी गरेका छन्।

वि.सं. २०६३ मङ्सिर ५ गते विस्तृत शान्ति सम्झौतामा रूपान्तरण भएको माओवादीको जनयुद्धले देशमा गणतन्त्र स्थापना र संघीय प्रणालीको थालनी गर्न महत्त्वपूर्ण योगदान पुर्‍याएको थियो। यसैका बलमा नेपालमा सामाजिक न्याय र समावेशी लोकतन्त्रका आधारहरू स्थापित भएका हुन्।

आज जनयुद्ध दिवस मनाइँदा सहिदहरूप्रति श्रद्धाञ्जली व्यक्त गर्दै विभिन्न कार्यक्रममार्फत् संघर्षका स्मृतिहरू पुनः जीवित पारिनेछ।