आज हमासले चार इजरायली महिला सैनिकलाई रिहा गर्ने

हमासले युद्धविराम सम्झौता अन्तर्गत आज (शनिबार) चार इजरायली महिला सैनिकलाई रिहा गर्ने भएको छ। इजरायल शनिबार हमासद्वारा बन्धक बनाइएका चार महिला सैनिकलाई स्वागत गर्ने तयारीमा छ।

हमासले २० वर्षीया करिना एरिभ, ड्यानिएला गिल्बोआ, नामा लेभी र १९ वर्षीया लिरी अल्बागलाई रिहा गर्दैछ। इजरायली अधिकारीहरूले परिवारलाई रिहाइको प्रक्रिया अगाडि बढ्ने बताएका छन्। यद्यपि, २९ वर्षीया अर्बेल येहुद रिहाइको सूचीमा छैनन्, जसलाई प्यालेस्टिनी इस्लामिक जिहादले नियन्त्रणमा राखेको हुनसक्छ।

हमासले शनिबार इजरायलबाट करिब २०० प्यालेस्टिनी बन्दी रिहा हुने अपेक्षा गरेको छ। यसमा आजीवन कारावास भएका १२० र उच्च सजाय भएका ८० कैदीहरू समावेश छन्।

चार महिला सैनिकहरू नाहल ओज सैन्य आधारबाट अपहरण गरिएका थिए। सात मध्ये एक ओरी मेगिडिशलाई उद्धार गरिएको थियो भने नोआ मार्सियानो मारिएकी थिइन्। आगम बर्गर अझै बन्दी छिन्, जसलाई आइतबार रिहा गरिनेछ। यी महिलाहरूको अपहरणको भिडियो सार्वजनिक भएको थियो। बन्धक र बेपत्ता परिवार फोरमले चार महिलाहरूको रिहाइलाई स्वागत गर्दै सबै बन्धकहरूको घर फिर्तीको आशा राखेको छ।

हालको युद्धविराम सम्झौताको पहिलो चरणको भागको रूपमा तीन बन्धकहरूलाई पहिले नै रिहा गरिएको थियोः एमिली डमारी, २८, रोमी गोनेन, २४, डोरोन स्टेनब्रेचर, ३१, सबै रिहा भैसकेका छन्। योसँगै इजरायलले पनि ९० प्यालेस्टिनी बन्दीलाई रिहा गरेको छ।

युद्धविराम सम्झौताको पहिलो चरण अझै पाँच हप्तासम्म चल्ने अपेक्षा गरिएको छ। सर्तहरू अन्तर्गत, शनिबार रिहा हुने चारसहित ३० थप इजरायली बन्धकहरू र सयौँ प्यालेस्टिनी बन्दीहरूलाई त्यस समयमा रिहा गरिनु पर्छ। सम्झौताका सर्तहरू अन्तर्गत, इजरायली सेनाहरू गाजाका केही भागहरूबाट फिर्ता हुनेछन् र गाजामा प्रवाह हुने मानवीय सहायताको मात्रा बढाइनेछ।