दुर्गा प्रसाईंको समर्थनमा आन्दोलन गर्ने ८ जना कर्तव्य ज्यान मुद्दामा पक्राउ

दुर्गा प्रसाईंको समर्थनमा आन्दोलन गर्ने ८ जना कर्तव्य ज्यान मुद्दामा पक्राउ परेका छन ।
प्रहरीका अनुसार उनीहरुले चालक भित्रै भएको बेला पेट्रोल बम हानेर आगजनी गरेका थिए ।

मेडिकल व्यवसायी दुर्गा प्रसाईंलाई पक्राउ गरेको विरोधमा झापामा ट्रकमा आगजनी गर्दा चालकको मृत्यु भएपछि उनका आठ जना समर्थकलाई प्रहरीले कर्तव्य ज्यान मुद्दामा कारबाही गरेको हो ।

पक्राउ पर्नेमा झापाको हल्दीबारी-१ का ४० वर्षीय भीम तुम्बापो लिम्बु, हल्दिबारी-१, का २४ वर्षीय विवश लिम्बु, हल्दिबारी १ कै ५१ वर्षीय विरबहादुर गुरुङ, विर्तामोड ७ का ३३ वर्षीय सुरेश चौधरी, विर्तामोड ३ का ३५ वर्षीय उदय लिम्बु, बुद्धशान्ति गाउँपालिका ४ का बलिहाङ माबो लिम्बु, मेचीनगर नगरपालिका-६ का ३४ वर्षीय राजेश महत र अर्जुनधारा नगरपालिका- ९ का ३८ वर्षीय रुद्र भुजेललाई कर्तव्य ज्यान मुद्दामा कारबाही अघि बढाइएको प्रहरीले जनाएको छ ।

उनीहरुले यही असोज ६ गते राति साढे १० बजे झापाको कनकाई नगरपालिका-८ स्थित पूर्वपश्चिम राजमार्गको बिरिङ खोलाको पुलमा युपी ५७ एटी ४४९३ नम्बरको भारतीय ट्रक र असोज ७ गते बिहान साढे २ बजेतिर बिर्तामोड नगरपालिका ६ गिरीबन्धु टी इस्टेटस्थित पूर्वपश्चिम राजमार्गमा डब्ल्यूबी ७३ ई ३०५६ नम्बरको भारतीय मालवाहक ट्रकमा प्रसाईंका समर्थकले आगजनी गरेका थिए ।

त्यस्तै, गिरीबन्धु टी इस्टेट नजिक आगजनी गरिएको ट्रक चालक पोदो रायको भारतमा उपचारको क्रममा यही असोज १९ गते मृत्यु भएको छ । उनको उपचार भारतस्थित नर्थ बंगाल मेडिकल कलेज एण्ड हस्पिटलमा भइरहेको थियो । उनको मृत्यु पश्चात कर्तव्य ज्यान मुद्दा अगाडी बढाएको प्रहरीले जानकारी दिएको छ ।