जाजरकोटमा बाढीले पुल भत्काउँदा पठनपाठन ठप्प

अबिरल वर्षाका कारण आएको बाढीले पुल भत्काउँदा जाजरकोटको शिवालय गाउँपालिका-६ स्थित खडकदेवी माध्यमिक विद्यालय टुनीबगरको पठनपाठन ठप्प भएको छ ।  खोला तर्न नसक्दा विद्यार्थीहरुको पठनपाठन बन्द भएको हो ।

विद्यालयहरूले खोला तर्न नसक्दा विद्यार्थीहरू विगत नौ दिनदेखि विद्यालय जान पाएका छैनन् ।

विद्यालय जाने बाटोमा रहेको भिउसखोलाको  पुल बाढिले भत्काए पछि  विद्यालय आवतजावत गर्न वैकल्पिक बाटो नहुँदा पठनपाठन बन्द गर्नुपरेको सो विद्यालयद्वारा जारी विज्ञप्तिमा उल्लेख छ ।

भिउसखोलामा रहेकाे पुल बाढीले भत्काए पछि  ट्रस ब्रिजको एउटा भाग पुरै भत्किएको शिवालय गाउँपालिकाकाे पूर्वाधार विकास कार्यालयले जानकारी दिएको छ ।

पुल निर्माण गर्न विकास साझेदार निकायसँग समन्वय भइरहेको छ र  विद्यार्थीको पढाइसँगै सर्वसाधारणको आवतजावत नै ठप्प भएको पूर्वाधार विकास कार्यालयले बताएकाे छ ।

विद्यालय व्यवस्थापन समितिको निणर्य अनुसार यही भदौ २ गतेदेखि विद्यालय बन्द भएको शिक्षा शाखाले बताएको छ ।