सुर्खेतकाे  बराहतालमा अवैध भरुवा बन्दुकसहित राना पक्राउ

सुर्खेत, ११ वैशाख । सुर्खेतको बराहताल गाउँपालिकाबाट प्रहरीले अवैध भरुवा बन्दुकसहित एक जनालाई पक्राउ गरेको छ।

बराहताल गाउँपालिका वडा नं. ४ मा अवैध रूपमा बन्दुक लुकाएर राखिएको भन्ने गोप्य सूचनाका आधारमा खटिएको प्रहरी टोलीले सो बन्दुक बरामद गरेको हो। अस्थायी प्रहरी पोष्ट तरंगा र इलाका प्रहरी कार्यालय बाबियाचौरबाट संयुक्त रूपमा खटिएको टोलीले स्थानीय ५३ वर्षीय शेर बहादुर रानालाई नियन्त्रणमा लिएको प्रहरीले जनाएको छ।

प्रहरीका अनुसार रानाले आफ्नै घरमा एक थान अवैध भरुवा बन्दुक लुकाएर राखेको अवस्थामा फेला परेको थियो। उनलाई हाल आवश्यक अनुसन्धानका लागि इलाका प्रहरी कार्यालय बाबियाचौरमा राखिएको छ।

घटनामा संलग्न रानाविरुद्ध हातहतियार तथा खरखजाना सम्बन्धी कसुरमा मुद्दा दर्ता गरी थप अनुसन्धान अघि बढाइएको प्रहरीले जनाएको छ।