कर्णालीलाई ‘सुटिङ हब’ बनाउने लक्ष्यसहित तेस्रो कर्णाली अन्तर्राष्ट्रिय चलचित्र महोत्सव सम्पन्न

काठमाडौं । तेस्रो कर्णाली अन्तर्राष्ट्रिय चलचित्र महोत्सव २०८३ कर्णाली प्रदेशको राजधानी वीरेन्द्रनगरमा सम्पन्न भएको छ। ‘घुमौँ कर्णाली, हेरौँ कर्णाली’ तथा ‘जनजनमा नेपाली चलचित्र, मनमनमा नेपाली चलचित्र’ भन्ने मूल नारासहित आयोजना गरिएको महोत्सवले कर्णालीको कला, संस्कृति र पर्यटनलाई चलचित्र क्षेत्रसँग जोड्ने महत्वपूर्ण माध्यमको रूपमा काम गरेको आयोजकले जनाएको छ।

चलचित्र विकास बोर्ड को सक्रिय सहभागिता तथा सहकार्यमा सम्पन्न महोत्सवले कर्णालीलाई चलचित्र छायाङ्कनका लागि आकर्षक गन्तव्य र कथा विकासको उर्वरभूमिका रूपमा स्थापित गर्ने लक्ष्य लिएको छ। बोर्डले यस क्षेत्रलाई चलचित्र पर्यटनको सम्भावनायुक्त क्षेत्रका रूपमा संस्थागत विकास गर्ने प्रतिबद्धता जनाएको छ।

समापन समारोहमा बोल्दै यामलाल कँडेल ले चलचित्र क्षेत्रको विकासका लागि प्रदेश सरकारले ठोस नीति र बजेटको व्यवस्था गर्ने प्रतिबद्धता व्यक्त गरे। यस्तै, कर्णाली प्रज्ञा प्रतिष्ठान ले कर्णालीमा छायाङ्कन गर्न आउने निर्माता तथा निर्देशकलाई विशेष सहकार्य र प्रोत्साहन प्रदान गर्ने घोषणा गरेको छ।

महोत्सवको प्रमुख आकर्षणका रूपमा ‘चलचित्र कथा प्रतियोगिता’को शुभारम्भ गरिएको छ। कर्णालीको भूगोल, जनजीवन, भाषा र इतिहासलाई चलचित्रमार्फत विश्वसामु प्रस्तुत गर्ने उद्देश्यले प्रतियोगिता सुरु गरिएको हो।

दीर्घकालीन रूपमा कर्णालीलाई अन्तर्राष्ट्रिय ‘सुटिङ हब’ बनाउने लक्ष्यअनुसार सल्यानस्थित कुपिण्डे दह मा विशेष चलचित्र पर्यटन कार्यक्रमसमेत आयोजना गरिएको थियो।