निर्वाचनका लागि झुलाघाट नाका तीन दिन बन्द हुने

बैतडी – आसन्न निर्वाचनलाई लक्षित गर्दै भारतसँग जोडिएको बैतडीको झुलाघाट सीमानाका तीन दिन बन्द गरिने भएको छ।

जिल्ला प्रशासन कार्यालय, बैतडी का प्रमुख जिल्ला अधिकारी कृष्ण थापाका अनुसार मतदान हुनुभन्दा ७२ घण्टा अघिदेखि नाका बन्द गरिने निर्णय गरिएको हो। फागुन १८ गते राति १२ः०० बजेदेखि फागुन २१ गते राति १२ः०० बजेसम्म झुलाघाट नाका पूर्ण रूपमा बन्द रहनेछ।

निर्वाचनलाई स्वतन्त्र, निष्पक्ष र भयरहित वातावरणमा सम्पन्न गर्न उक्त निर्णय गरिएको प्रशासनले जनाएको छ। जिल्लाको ३१ किलोमिटर सीमा क्षेत्र भारतसँग जोडिएकाले सीमा क्षेत्रमा उच्च सुरक्षा सतर्कता अपनाइएको छ। सीमा क्षेत्रमा खटिएका सशस्त्र प्रहरी बलका बिओपीमार्फत सुरक्षा निगरानीसमेत कडा पारिएको जिल्ला सुरक्षा समितिले जनाएको छ।

तल्लोसोराड क्षेत्रमा पर्ने महाकाली नदी का विभिन्न घाटबाट डुङ्गामार्फत हुने आवतजावतसमेत निर्वाचन अवधिभर बन्द गरिने प्रमुख जिल्ला अधिकारी थापाले जानकारी दिए।

अत्यावश्यक काम परेमा भने दुई देशबीचको आपसी समन्वयमा नाका खोल्न सकिने प्रशासनले जनाएको छ।