रास्वपाका सांसदहरूले मासिक १६ हजार र मन्त्रीहरूले १८ हजार लेबी बुझाउनुपर्ने

 काठमाडौं । राष्ट्रिय स्वतन्त्र पार्टी (रास्वपा) ले आफ्ना सांसद र मन्त्रीहरूका लागि मासिक लेबी निर्धारण गरेको छ ।

बिहीबार सिंहदरबारमा बसेको संसदीय दलको बैठकले उक्त प्रस्ताव पारित गरेको पार्टीका मुख्य सचेतक कबिन्द्र बुर्लाकोटी ले जानकारी दिए ।

उनका अनुसार, सांसदहरूले मासिक १६ हजार ५ सय रुपैयाँ र मन्त्रीहरूले १८ हजार रुपैयाँ लेबी बुझाउनुपर्ने व्यवस्था गरिएको छ ।

त्यस्तै, स्वकीय कर्मचारीका लागि पनि मासिक २ हजार रुपैयाँ लेबी तोकिएको छ । हालका लागि यो व्यवस्था मन्त्रीका स्वकीय सचिवमा लागू हुनेछ ।

बुर्लाकोटीका अनुसार भविष्यमा सांसदहरूले पनि स्वकीय राख्न पाउने व्यवस्था लागू भएमा उनीहरूका स्वकीयका लागि समेत लेबी निर्धारण गरिनेछ ।

पार्टीले आन्तरिक आर्थिक व्यवस्थापनलाई व्यवस्थित बनाउन यस्तो निर्णय गरेको जनाएको छ ।