पेस्तोलसहित भारतीय नागरिक पक्राउ

 सुनसरी — सशस्त्र प्रहरी बल ले सुनसरीको जमुवा सीमावर्ती क्षेत्रबाट पेस्तोलसहित एक भारतीय नागरिकलाई नियन्त्रणमा लिएको छ।

भारतको अररिया ग्राम पञ्चायत–४ बस्ने ३६ वर्षीय राम थेलन पासवानलाई शुक्रबार साँझ नेपालतर्फ आउँदै गरेको अवस्थामा पक्राउ गरिएको हो। उनको साथबाट इटालीमा बनेको पेस्तोल र सोका तीन राउन्ड गोली बरामद भएको सशस्त्र प्रहरीले जनाएको छ।

भारतीय नम्बर प्लेटको मोटरसाइकलमा आएका पासवानको साथबाट लागूऔषध ब्राउनसुगर १०० ग्राम, नेपाली रुपैयाँ ७ हजार ५ सय र भारतीय रुपैयाँ ९ हजार ३८० समेत बरामद गरिएको सशस्त्र प्रहरीका सहप्रवक्ता शैलेन्द्र थापाले जानकारी दिए। पक्राउ परेका पासवानलाई बरामद सामग्रीसहित आवश्यक कारबाहीका लागि सम्बन्धित निकायमा बुझाइएको जनाइएको छ।

यसैबीच, सशस्त्र प्रहरी बल नं १ बराह बाहिनी का बाहिनीपति मनिष थापाले निर्वाचन सुरक्षालाई मध्यनजर गर्दै सीमानाकामा चेकजाँचलाई थप कडाइ गर्न निर्देशन दिएका छन्।

इलाम, झापा, मोरङ र सुनसरी जिल्लाका सीमानाकाको स्थलगत अनुगमनपछि बाहिनीपतिले सीमाबाट हुने अवैध क्रियाकलाप नियन्त्रण गर्न मातहतका युनिटलाई निर्मम ढङ्गले प्रस्तुत हुन निर्देशन दिएको सहप्रवक्ता थापाले जानकारी दिए।