जुम्ला उच्च अदालतको कीर्तिमानी प्रगति: एकै वर्षमा ९३ प्रतिशत मुद्दाको छिनोफानो

जुम्ला। जुम्लास्थित उच्च अदालत सुर्खेतको जुम्ला इजलासले न्याय सम्पादनमा एउटा नयाँ कीर्तिमान कायम गरेको छ। गत आर्थिक वर्ष २०८१/८२ मा अदालतले आफूसमक्ष आएका कुल मुद्दाहरूको ९३.०८ प्रतिशत फछर्यौट गरी ऐतिहासिक सफलता हात पारेको हो। यसले अदालतको कार्यसम्पादनमा उल्लेख्य सुधार आएको मात्र नभई आम नागरिकमा न्यायप्रति आशा र भरोसासमेत बढाएको छ।

अदालतका मुख्य न्यायाधीश श्यामजी प्रधानका अनुसार, गत आर्थिक वर्षमा २६ पुराना र १९१ नयाँ गरी जम्मा २१७ मुद्दा दर्ता भएका थिए। जसमध्ये २०२ वटा मुद्दाको किनारा लागेको छ भने अब जम्मा १५ वटा मुद्दा मात्र बाँकी छन्। यो अदालतले आफ्नो वार्षिक लक्ष्य (१७८ मुद्दा) भन्दा पनि बढी मुद्दा फछर्यौट गर्न सफल भएको हो। पछिल्ला तीन वर्षको तथ्याङ्क हेर्दा, आर्थिक वर्ष २०७९/८० मा ८०.३९% र २०८०/८१ मा ९०.६८% मुद्दा फछर्यौट भएको थियो, जसले जुम्ला इजलासको कार्यसम्पादन निरन्तर प्रगतिउन्मुख रहेको देखाउँछ। गत वर्ष अदालतले जबर्जस्ती करणी, ज्यान मार्ने उद्योग, लागुऔषध, र जातीय विभेदजस्ता गम्भीर प्रकृतिका मुद्दामध्ये अधिकांशको छिनोफानो गरेको छ।