• असार २९, २०८२
  • No Comment
  • 51

हुम्लाको अदानचुलीमा पानीको अभावले हुन सकेन राेपाइँ

अदानचुली  । साउन लागिसक्दा पनि हुम्लाको अदानचुली गाउँपालिकाका सयौं हेक्टर खेतमा अझै रोपाइँ हुन सकेको छैन। समयमै बीउ उम्रिए पनि सिँचाइको पानी नहुँदा खेत सुक्खा छन्, र किसान आकाशतिर हेरिरहेका छन्।

स्थानिय किसानहरूका अनुसार धान र कोदो रोप्नका लागि बीउ त तयार छ, तर खेतमा पानी पुग्न सकेको छैन। “नहरको मुहान नै छैन, वर्षा पनि भएन। अब आकासे पानीको भरमा छौं,” एक स्थानीय किसानले गुनासो गरे।

गत वैशाखमा आएको बाढीले अधिकांश सिँचाइ कुलोहरू बगाएको छ। खोलाको पानी ल्याउने योजनाहरू अधुरा छन्, र अहिले खेतमा झार मात्र उम्रिएको अवस्था छ।

गाउँपालिकामा हरेक वर्ष करोडौँ रुपैयाँ संघ, प्रदेश र स्थानीय सरकारबाट विकास योजनामा विनियोजन गरिए पनि त्यसको प्रभाव सिँचाइ क्षेत्रमा देखिएको छैन। अधिकांश बजेट व्यक्तिगत योजनामा खर्च हुने गरेको स्थानीयले आरोप लगाएका छन्।

“पानी नहुँदा बीउ सुक्न थालिसक्यो, खेत बाँझो रहँदा किसानहरू हतास छन्”, स्थानीय ललित बुढा भन्छन्, “तर सरकारले कृषि योजनाको बजेट पर्खाल, गेट, बोर्डमा खर्च गरिरहेको छ।”

गाउँपालिकाले ‘कृषिमा आधुनिकीकरण’ कार्यक्रम सार्वजनिक गरे पनि सोलार पम्प, डिपबोरिङ, कुलो निर्माण वा मर्मतजस्ता महत्वपूर्ण योजना फाइलमै रोकिएका छन्।

“खेत सुक्छ, किसानको आवाज सुनिँदैन,” बुढा भन्छन्, “अव्यवस्थित बीउ वितरण र सिँचाइ अभावले यहाँको कृषि संकटमा परेको छ।”

अदानचुलीमा विगतका वर्षभन्दा यो वर्ष झनै चिन्ताजनक अवस्था रहेको भन्दै किसानहरूले तत्काल सिँचाइको वैकल्पिक समाधानको माग गरेका छन्।

सम्बन्धित खबर

Leave a Reply

Your email address will not be published. Required fields are marked *