सुनचाँदी व्यवसायी संघ दैलेखद्वारा मोटरसाइकल र्याली

दैलेख । नेपाल सरकारले सुनका गहनामा २ प्रतिशत विलासिता कर र बहुमूल्य हिरामा १३ प्रतिशत कर लगाउने निर्णय गरेकोप्रति आपत्ति जनाउँदै दैलेखमा सुनचाँदी व्यवसायीहरूले मोटरसाइकल र्‍यालीसहितको विरोध प्रदर्शन गरेका छन्।

दैलेख सदरमुकामको लोकतान्त्रिक चोकबाट सुरु भएको मोटरसाइकल र्‍यालीले सदरमुकाम परिक्रमा गरी देवकोटा चोकमा विरोधसभा सम्पन्न गरेको थियो। र्‍यालीमा सयौंको संख्यामा सुनचाँदी व्यवसायी, उपभोक्ता र युवाहरूको सहभागिता देखिएको थियो।

रत्न आभूषण तथा सुनचाँदी व्यवसायी संघ क्षेत्र नं २ दैलेखका अध्यक्ष धनबहादुर सुनारले कार्यक्रममा बोल्दै, “सरकारको कर नीतिले यो क्षेत्र संकटमा परेको छ। सुनचाँदीको क्षेत्रमा दक्ष सिप भएका युवाहरू विदेश पलायन हुन लागेका छन्,” भन्दै सरकारको निर्णय तत्काल फिर्ता लिन माग गर्नुभयो। उहाँले सुनचाँदी व्यवसायबाट राज्यले अर्बौं राजस्व संकलन गरिरहेको भन्दै, “यो व्यवसायले लाखौं युवालाई स्वदेशमै रोजगारी दिएको छ, त्यसैले सरकारले व्यवसायमै धक्का पुग्ने खालका निर्णय फिर्ता लिनुपर्छ,” भन्नुभयो।

नेपाल सुनचाँदी व्यवसायी संघ दैलेखका अध्यक्ष खगिराम सुनारले पनि विरोध सभा सम्बोधन गर्दै, “सरकारको यो कर नीतिले व्यवसायी मात्र होइन, उपभोक्ताहरूलाई समेत असर पुर्‍याएको छ। निर्णय खारेज नभएसम्म आन्दोलन जारी रहनेछ,” भन्दै सम्पूर्ण व्यवसायी र उपभोक्तालाई आन्दोलनमा एकजुट हुन आग्रह गर्नुभयो।

प्रदर्शनकारीहरूले सरकारले निर्णय नसच्याएसम्म व्यवसाय बन्द गर्ने चेतावनी दिएका छन्। हाल दैलेखमा सुनचाँदी पसलहरू पूर्ण रूपमा बन्द छन्।

उनीहरूले सरकारसँग माग गर्दै भनेका छन् — “कर घटाएर व्यवसायमैत्री नीति बनाइनुपर्छ, नत्र आन्दोलन अझ व्यापक बनाइनेछ।”