आजको मौसम : कोशी, बागमती, गण्डकी र लुम्बिनीमा चट्याङ्गसहित वर्षाको सम्भावना 

काठमाडौं। देशभर विभिन्न मौसमीय प्रणालीको प्रभाव कायमै रहेका कारण आज पनि केही स्थानहरूमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ।

महाशाखाका अनुसार हाल देशमा पश्चिमी वायु, स्थानीय वायु तथा बंगालको खाडी र अरब सागरबाट आएको जलवाष्पयुक्त हावाको आंशिक प्रभाव देखिएको छ। यसले गर्दा देशका विभिन्न भूभागमा बदलीसहितको मौसम बनेको हो।

कोशी, बागमती, गण्डकी र लुम्बिनी प्रदेशसहित देशको पहाडी भू–भागमा आंशिकदेखि साधारणतया बदली रहनेछ भने बाँकी भू–भागमा मौसम मुख्यतया सफादेखि आंशिक बदली रहनेछ। ती प्रदेशका थोरै स्थानहरूमा र अन्य प्रदेशका एकदुई स्थानमा मेघगर्जन, चट्याङ्गसहित हल्कादेखि मध्यम वर्षाको सम्भावना रहेको महाशाखाले जनाएको छ।

साथै, देशका उच्च पहाडी तथा हिमाली भू–भागका एकदुई स्थानहरूमा हल्का वर्षा र हिमपातको सम्भावना पनि छ।

 
रातिपनि कोशी, मधेश, बागमती, गण्डकी प्रदेशसहित देशको पहाडी भू–भागमा आंशिकदेखि साधारणतया बदली रहनेछ। ती क्षेत्रमा पनि मेघगर्जन र चट्याङ्गसहित हल्कादेखि मध्यम वर्षाको सम्भावना रहेको छ। कोशी, बागमती र गण्डकी प्रदेशका उच्च पहाडी तथा हिमाली भू–भागमा हल्का वर्षा र हिमपात हुनसक्ने बताइएको छ।

 
विभागले गर्मीका कारण र वर्षाका प्रभावले दैनिक जनजीवन, कृषि, स्वास्थ्य, सडक तथा हवाई यातायातमा असर पर्न सक्ने भएकाले सतर्क रहन आग्रह गरेको छ। विशेषगरी चट्याङ्ग र मेघगर्जन हुने सम्भावित क्षेत्रमा सावधानी अपनाउन र आवश्यक तयारी गर्न सुझाव दिइएको छ।