- बैशाख २३, २०८२
- No Comment
- 54
आजकाे माैसम :पहाडी भूभागमा चट्याङसहित वर्षाको सम्भावना

काठमाडौं । देशका विभिन्न स्थानमा चट्याङसहित हल्कादेखि मध्यम वर्षाको सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले बताएकाे छ।
महाशाखाका अनुसार हाल देशमा पश्चिमी वायु र स्थानीय वायुको प्रभाव सक्रिय रहेको छ। साथै, बङ्गालको खाडी र अरब सागरबाट जलवाष्पयुक्त हावा प्रवेश गरिरहेको छ, जसको कारण मौसममा थप आर्द्रता आएको बताइएको छ।
हाल देशभर आंशिकदेखि साधारणतया बदली रहेको छ भने कोशी, मधेश, बागमती, गण्डकी, लुम्बिनी र कर्णाली प्रदेशका केही स्थानमा हल्कादेखि मध्यम वर्षा भइरहेको छ।
दिउँसोको समयसम्म कोशी प्रदेशसहित देशका पहाडी भूभागका थोरै स्थान र तराईका केही भागमा चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ। हिमाली भेगमा भने हल्का वर्षासहित हिमपात हुन सक्ने सम्भावना पनि उल्लेख गरिएको छ।
आज राति कोशी, गण्डकी र सुदूरपश्चिम प्रदेशसहित पहाडी भूभागमा आंशिकदेखि साधारणतया बदली रहनेछ भने अन्य भूभागमा मौसम मुख्यतः सफा वा आंशिक बदली रहने छ।
आज सूर्योदय बिहान ५:२० बजे भएको हो भने सूर्यास्त साँझ ६:४१ मा हुने जानकारी विभागले दिएको छ।