अछामको जयगढ बजारमा आगलागी : २७ घर जले 

अछाम । अछामको बान्नीगढी जयगढ गाउँपालिका केन्द्रसमेत रहेको जयगढ बजारमा मंगलबार साँझ आगलागी भएको छ। साँझ ७ बजेतिर एक पसलबाट सुरु भएको आगोले बजारका २७ घर जलेका छन्। जलेका घरहरूमध्ये १२ वटा व्यवसायिक पसल रहेको प्रहरीले जनाएको छ।

आगो नियन्त्रणमा आइसकेको छ। तर, घटनाले ठूलो धनमालको क्षति पुर्‍याएको अछाम प्रहरी प्रमुख डिएसपी ईश्वरीप्रसाद भण्डारीले जानकारी दिएका छन्। उनका अनुसार हालसम्म क्षतिको यकिन विवरण नआएको भए पनि प्रारम्भिक अनुमानअनुसार करिब सात करोड रुपैयाँ बराबरको क्षति भएको छ।

डिएसपी भण्डारीका अनुसार आगो ग्यास सिलिण्डरबाट सुरु भई बजार क्षेत्रमा तीव्र रूपमा फैलिएको थियो। साघुरो गल्लीका कारण दमकलसमेत घटनास्थलमा सहजै पुग्न नसक्दा आगो नियन्त्रणमा लिन ढिलो भएको हो। आगलागी सुरु भएको साँझ ७ बजेदेखि आगो राति १२ बजे मात्र नियन्त्रणमा लिइएको थियो।

अहिले स्थानीय बासिन्दा, सुरक्षाकर्मी र दमकलको सहयोगमा पूर्णरूपमा आगो निभाइएको छ। घटनास्थलमा क्षति मूल्यांकन र थप विवरण संकलनको काम जारी रहेको प्रहरीले जनाएको छ।