सुर्खेत उपत्यका नगर विकास समितिमा झन्डै ३ करोड रुपैयाँ हिनामिना आरोप, ५ जनाविरुद्ध मुद्दा

सुर्खेत। अख्तियार दुरुपयोग अनुसन्धान आयोगले सुर्खेत उपत्यका नगर विकास समितिका तत्कालीन सदस्य सचिवसहित पाँच जनाविरुद्ध भ्रष्टाचार मुद्दा दायर गरेको छ।

आयोगका प्रवक्ता सुरेश न्यौपानेका अनुसार राजस्व चुहावट गरी भ्रष्टाचार गरेको आरोपमा बुधबार विशेष अदालतमा मुद्दा दायर गरिएको हो।

मुद्दामा तत्कालीन सदस्य सचिवहरू टीकाराम ढकाल, नरहरि तिवारी र गेहेन्द्रबहादुर डाँगीसँगै तत्कालीन लेखा अधिकृत हरिबहादुर क्षत्रीकी श्रीमती सीमाकुमारी चन्द (क्षत्री) तथा सह–लेखापाल खड्कबहादुर रानालाई प्रतिवादी बनाइएको छ।

आयोगका अनुसार सटर कबल तथा जग्गा भाडाबाट उठेको राजस्व रकम समितिको खातामा जम्मा नगरी दुरुपयोग गरिएको उजुरीपछि अनुसन्धान गरिएको थियो। अनुसन्धानका क्रममा उठेको राजस्व हिनामिना भएको पुष्टि भएपछि भ्रष्टाचार मुद्दा दायर गरिएको जनाएको छ।

आयोगले टीकाराम ढकालविरुद्ध ६४ लाख २८ हजार ४३७ रुपैयाँ, नरहरि तिवारीविरुद्ध १ करोड ४ लाख ७१ हजार ९४२ रुपैयाँ तथा गेहेन्द्रबहादुर डाँगीविरुद्ध ७२ लाख ७८ हजार ११० रुपैयाँ बिगो कायम गरेको छ। यस्तै सीमाकुमारी चन्दविरुद्ध २ करोड ९० लाख ९६ हजार ४४१ रुपैयाँ र खड्कबहादुर रानाविरुद्ध २ करोड ९४ लाख ८७ हजार ६८१ रुपैयाँ बिगो कायम गरी कैद तथा जरिवानाको मागदाबी गरिएको आयोगले जनाएको छ।

तत्कालीन लेखा अधिकृत हरिबहादुर क्षत्रीको निधन भइसकेकाले उनकी श्रीमती सीमाकुमारी चन्दलाई प्रतिवादी बनाइएको आयोगले उल्लेख गरेको छ।