सुर्खेतमा ब्राउनसुगर, नगद र सुनचाँदीसहित दुई जना पक्राउ

प्रहरीका अनुसार उनीहरूको शरीर तथा घरकोठा खानतलासी गर्दा १०९ पुडिया ब्राउनसुगर बरामद भएको छ। बरामद लागुऔषधको तौल प्लास्टिकसहित ७ ग्राम ८७० मिलिग्राम र शुद्ध तौल ३ ग्राम ७२० मिलिग्राम रहेको जनाएको छ। साथै, स्रोत नखुलेको नेपाली रुपैयाँ ५ लाख १५ हजार ५ सय ५० नगदसमेत फेला परेको छ।

त्यसैगरी, प्रहरीले सुनजस्तो देखिने पहेँलो धातुका विभिन्न गहना तथा चाँदीजस्तो देखिने सेतो धातुका गरगहनासमेत बरामद गरेको जनाएको छ। बरामद सामग्रीमा तिलहरी, औंठी, चन्द्रमा, नथिया, बुलाकी, माला, पाउजु, बाला, सिक्री, बिछिया लगायतका गहनाहरू रहेका छन्।

प्रहरीका अनुसार बरामद गरिएका गहनाको आधिकारिक बिलविजक फेला नपरेकाले ती सामग्रीको स्रोतबारे समेत अनुसन्धान भइरहेको छ। पक्राउ परेका दुवैमाथि लागुऔषध कारोबार तथा अवैध सम्पत्तिसम्बन्धी कसुरमा थप अनुसन्धान भइरहेको प्रहरीले जनाएको छ।