जाजरकोटमा स्टेसनरी सामान बोकेको जिप दुर्घटना : चालक घाइते

जाजरकोट, ३० वैशाख । भेरी नगरपालिका–४स्थित पानी ट्याङ्की क्षेत्रमा स्टेसनरी सामान बोकेको जिप दुर्घटना हुँदा चालक घाइते भएका छन्।

बुधबार बिहान करिब ९ः५० बजे खलंगा बजारबाट नेटा बजारतर्फ जाँदै गरेको रा १ च ९२९ नम्बरको जिप उकालो चढ्ने क्रममा अचानक पछाडि सरेर सडकबाट करिब ३०० मिटर तल खसेको प्रहरीले जनाएको छ।

दुर्घटनामा परी दाङको तुलसीपुर उपमहानगरपालिका–६ निवासी ३७ वर्षीय चालक टोप बहादुर बस्नेत घाइते भएका छन्।

घटनाको जानकारी प्राप्त हुनासाथ जिल्ला प्रहरी कार्यालय जाजरकोटबाट प्रहरी सहायक निरीक्षक किरण गुरुङको नेतृत्वमा ७ जनाको टोली घटनास्थलमा खटिएको थियो। प्रहरीले घाइते चालकको उद्धार गरी उपचारका लागि जिल्ला अस्पताल खलंगा पठाएको जनाएको छ।

अस्पताल स्रोतका अनुसार घाइते बस्नेतको अवस्था मध्यम रहेको छ। दुर्घटनाग्रस्त जिप घटनास्थलमै रहेको प्रहरीले जनाएको छ।