चौकुने गाउँपालिकामा स्थानीय तहमा बालकेन्द्रीत वार्षिक योजना तर्जुमा अन्तरक्रिया कार्यक्रम सम्पन्न

 सुर्खेत। UNICEF को सहकार्य तथा चौकुने गाउँपालिका को आयोजनामा स्थानीय तहमा बालकेन्द्रीत वार्षिक योजना तर्जुमा सम्बन्धी अन्तरक्रिया कार्यक्रम सम्पन्न भएको छ। कार्यक्रममा विशेष अतिथिका रूपमा चौकुने गाउँपालिकाका उपाध्यक्ष नरबहादुर बान्तोला, वडा नं. १ का वडा अध्यक्ष जिरक बडुवाल, सामाजिक विकास संयोजक एवं वडा नं. ८ का वडा अध्यक्ष कमल जी.सी., वडा नं. ७ का वडा अध्यक्ष धनिराम धमला, वडा नं. ६ का वडा अध्यक्ष गोविन्द थापा, वडा न ५ का वडा अध्यक्ष तुलाराम हिस्की मगर ,वडा न ४ का वडा अध्यक्ष टोप बहादुर वुढा क्षेत्री , वडा नं. ९ का वडा अध्यक्ष कबिराम खनाल लगायत विभिन्न शाखाका शाखा प्रमुख तथा कार्यपालिका सदस्यहरूको सहभागिता रहेको थियो। कार्यक्रमको सुरुवात स्वागत मन्तव्यसँगै गरिएको थियो।

सो अवसरमा कर्णाली प्रदेश UNICEF कार्यालय प्रमुख दिपक श्रेष्ठ ले कार्यक्रमको उद्देश्यबारे जानकारी गराउँदै स्थानीय तहको योजना निर्माण प्रक्रियामा बालबालिकाको हकहित, आवश्यकता तथा समग्र विकासलाई प्राथमिकतामा राख्नुपर्ने आवश्यकता औंल्याउनुभयो। उहाँले बालमैत्री तथा बालकेन्द्रीत योजना निर्माणमार्फत शिक्षा, स्वास्थ्य, पोषण, संरक्षण र सहभागिताको क्षेत्रमा सकारात्मक परिवर्तन ल्याउन सकिने धारणा व्यक्त गर्नुभयो। कार्यक्रमका अध्यक्ष खडक बिवस बासपानेले चौकुने गाउँपालिकाले बालबालिकाको हितलाई केन्द्रमा राखेर नीति तथा कार्यक्रम अघि बढाइरहेको उल्लेख गर्दै आगामी दिनमा बालमैत्री स्थानीय शासनलाई अझ प्रभावकारी रूपमा कार्यान्वयन गरिने प्रतिबद्धता व्यक्त गर्नुभयो।

उहाँले बालबालिकाको उज्ज्वल भविष्य सुनिश्चित गर्न स्थानीय तहका योजना तथा बजेट निर्माण प्रक्रियामा बालकेन्द्रीत दृष्टिकोण आवश्यक रहेको बताउनुभयो। त्यसैगरी उपाध्यक्ष नरबहादुर बान्तोलाले स्थानीय सरकार बालअधिकार संरक्षण र बालमैत्री वातावरण निर्माणमा प्रतिबद्ध रहेको बताउनुभयो। कार्यक्रममा विभिन्न वडाका वडा अध्यक्षहरूले आफ्नो वडामा बालबालिकाको शिक्षा, स्वास्थ्य, पोषण, सरसफाइ तथा संरक्षणका क्षेत्रमा भइरहेका गतिविधिबारे जानकारी गराउँदै आगामी योजनामा बालकेन्द्रीत कार्यक्रमलाई प्राथमिकता दिने धारणा राखेका थिए।

कार्यक्रममा सहभागी विभिन्न शाखाका प्रमुख तथा कार्यपालिका सदस्यहरूले बालबालिकाको समग्र विकासका लागि स्थानीय तह, समुदाय तथा सरोकारवाला निकायबीच समन्वय र सहकार्य आवश्यक रहेको बताएका थिए। अन्तरक्रिया कार्यक्रमले आगामी वार्षिक योजना तथा कार्यक्रम निर्माण प्रक्रियामा बालबालिकासँग सम्बन्धित सवाललाई प्रभावकारी रूपमा समेट्न महत्वपूर्ण सहयोग पुग्ने अपेक्षा गरिएको आयोजकले जनाएको छ।