सुर्खेतमा कुलपूजाका लागि अछाम जाँदै गर्दा भीरबाट लडेर एक जनाको मृत्यु

सुर्खेत, असार १४ — सुर्खेतको पञ्चपुरी नगरपालिकामा भीरबाट लडेर एक जनाको मृत्यु भएको छ। मृत्यु हुनेमा पञ्चपुरी नगरपालिका–९ कुलिबाद निवासी अन्दाजी ५५ वर्षीय लोकबहादुर सुनार रहेका छन्।

प्रहरीका अनुसार आइतबार दिउँसो करिब ३:१५ बजे पञ्चपुरी नगरपालिका–७ स्थित कोल्टेभीर क्षेत्रमा पैदल हिँडिरहेका बेला उनी करिब ३०० मिटर तल खसेका थिए। घटनास्थलमै उनको मृत्यु भएको प्रहरीले जनाएको छ।

 प्रहरी निरीक्षक शाहीको टोली साँझ ५:१० बजे घटनास्थल पुगेको थियो। सुर्खेत प्रहरीका अनुसार मृतक सुनार आफ्नी श्रीमती धौली सुनार, छोरा कमल सुनार र बुहारी टिकुला सुनारसँग कुलदेवताको पूजा गर्न अछामको तुर्माखाँद गाउँपालिका–४ जुँएतर्फ पैदल यात्रा गरिरहेका थिए।

यात्राका क्रममा बाटोमा चिप्लिएर उनी भीरबाट खसेको प्रहरीले जनाएको छ। खस्ने क्रममा सल्लाको मुडामा अड्किएको अवस्थामा उनको शव फेला परेको थियो।

प्रहरीका अनुसार मृतकका अन्य पारिवारिक सदस्यहरू सकुशल रहेका छन् भने घटनाबारे थप अनुसन्धान भइरहेको छ।