जबरजस्ती करणी आरोपमा जुम्लाका वडाध्यक्ष पक्राउ

सुर्खेत । जुम्लाको पातारासी गाउँपालिका–५ का वडाध्यक्ष दत्तबहादुर बुढा जबरजस्ती करणी आरोपमा पक्राउ परेका छन्।

जिल्ला प्रहरी कार्यालय जुम्लाले वडाध्यक्ष बुढालाई बुधबार पक्राउ गरेको जनाएको छ। एक महिलाले आफूलाई पटक–पटक धम्क्याउँदै जबरजस्ती करणी गरेको भन्दै उजुरी दिएपछि प्रहरीले अनुसन्धान अघि बढाएको हो।

उजुरीका आधारमा पक्राउ पुर्जी लिएर बुढालाई नियन्त्रणमा लिइएको जिल्ला प्रहरी कार्यालय जुम्लाका प्रहरी नायब उपरीक्षक (डीएसपी) रबिनबाबु रेग्मीले जानकारी दिए।

प्रहरीका अनुसार घटनासम्बन्धी थप अनुसन्धानका लागि अदालतबाट पाँच दिनको म्यादसमेत थप गरिएको छ।

घटनाबारे थप अनुसन्धान जारी रहेको प्रहरीले जनाएको छ।