चिङ्गाड गाउँपालिका–२ को गौशालामा लापरबाही, पशुहरूको अवस्था चिन्ताजनक

सुर्खेत — चिङ्गाड गाउँपालिका वडा नं. २ मा रहेको एक गौशालामा व्यवस्थापन पक्षको लापरबाहीका कारण पशुहरूको अवस्था चिन्ताजनक बनेको छ।

उक्त गौशालामा व्यवस्थापन पक्षको लापरबाही देखिएको भन्दै स्थानीयवासीले गम्भीर चिन्ता व्यक्त गरेका छन्। चिङ्गाड गाउँपालिकाद्वारा सञ्चालित उक्त गौशालामा रहेका गाईवस्तुहरू उचित हेरचाहको अभावमा कष्टकर अवस्थामा रहेको आरोप स्थानीयले लगाएका छन।

स्थानीयका अनुसार गौशालामा पशुहरूलाई आवश्यक दाना–पानी, सरसफाइ तथा स्वास्थ्य उपचारको पर्याप्त व्यवस्था गरिएको छैन। लामो समयदेखि सरसफाइ नहुँदा गौशालाभित्र फोहोर थुप्रिएको र दुर्गन्ध फैलिएको बताइएको छ। अस्वस्थ वातावरणका कारण कतिपय गाईवस्तुहरू कमजोर बन्दै गएको स्थानीयको भनाइ छ।

गौशालामा काम गर्ने व्यक्तिहरू दुर्ग बहादुर पौडेल र खड्ग बहादुर खड्का रहेका छन । स्थानीयले पशुहरूको उचित संरक्षण र व्यवस्थापनमा ध्यान दिन सम्बन्धित पक्षसँग माग गरेका छन्।

“गौशालामा यस्तो अवस्था हुनु दुःखद हो, सम्बन्धित निकायले तत्काल अनुगमन गरेर सुधार गर्नुपर्छ,” एक स्थानीयले बताए।

स्थानीयवासीहरूले चिङ्गाड गाउँपालिका तथा सम्बन्धित निकायको ध्यानाकर्षण गराउँदै गौशालाको प्रभावकारी व्यवस्थापन, नियमित अनुगमन र पशुहरूको उचित संरक्षणका लागि तत्काल कदम चाल्न आग्रह गरेका छन्।