कार्यन्वयनयोग्य र प्रतिफलमुखी योजना छनोट गर्न मुख्यमन्त्री कँडेलको निर्देशन

सुर्खेत — कर्णाली प्रदेशका मुख्यमन्त्री यामलाल कँडेल ले आगामी आर्थिक वर्षको नीति तथा कार्यक्रम तथा बजेट तर्जुमा गर्दा प्रतिफल दिने र कार्यान्वयनयोग्य आयोजना छनोट गर्न निर्देशन दिएका छन्।

कर्णाली प्रदेश समन्वय परिषद्को एघारौं बैठकलाई सम्बोधन गर्दै उनले विकासलाई दीगो र आत्मनिर्भर बनाउन कार्यान्वयनमुखी योजना आवश्यक रहेको बताए। उनले कृषि, पर्यटन, जलस्रोत, उद्योग र सेवा क्षेत्रलाई आयआर्जनका मुख्य आधारका रूपमा विकास गर्नुपर्नेमा जोड दिए।

मुख्यमन्त्री कँडेलले प्रदेश र स्थानीय तहबीच समन्वय र सहकार्यमार्फत आर्थिक समृद्धि हासिल गर्न सकिने उल्लेख गर्दै वित्तीय अनुशासन, पारदर्शिता र जवाफदेहिता सुदृढ बनाउनुपर्ने बताए।

बैठकमा नीति तथा कार्यक्रम, बजेट तर्जुमा, राजस्व व्यवस्थापन, विकास आयोजनाको समन्वय तथा स्थानीय तहका कार्यसम्पादनलगायत विषयमा छलफल गरिएको जनाइएको छ।