१० युवालाई ‘कर्णाली युथ आइकन अवार्ड’ प्रदान

कर्णाली प्रदेशका १० जना युवालाई ‘कर्णाली युथ आइकन अवार्ड’ प्रदान गरिएको छ। कर्णाली युवा महोत्सवको अवसरमा विभिन्न क्षेत्रमा उत्कृष्ट योगदान पुर्‍याएका युवाहरूलाई सम्मान गरिएको हो।

महोत्सवको समापन समारोहमा प्रदेश प्रमुख यज्ञराज जोशी ले अवार्ड प्रदान गरेका थिए। स्वास्थ्य क्षेत्रमा योगदानका लागि नेत्र रोग विशेषज्ञ डा. आकांक्षा राना सम्मानित भएका छन्।

त्यसैगरी पत्रकारितातर्फ चाँदनी कठायत, गीतसंगीततर्फ इब्सल सन्ज्याल र शिव संगीत, व्यवसायतर्फ मनिषजंग शाही, उद्यमीतर्फ प्रमिला बुढा, सामाजिक क्षेत्रमा हिक्मत वादी, समाजसेवातर्फ हरि कँडेल, चलचित्रतर्फ केशव थापा तथा युवा उत्प्रेरणामा आदर्शविक्रम सिंह पुरस्कृत भएका छन्।

कर्णालीलाई कर्मथलो बनाएर समाज रूपान्तरणमा योगदान पुर्‍याउने र प्रेरणादायी कार्य गर्ने युवाहरूलाई अवार्ड प्रदान गरिएको आयोजकले जनाएको छ।