चौकुने गाउँपालिकामा प्रारम्भिक बालविकास सहजकर्ताका लागि १० दिने क्षमता अभिवृद्धि तालिम सम्पन्न

चौकुने गाउँपालिकामा प्रारम्भिक बालविकास (ECD) केन्द्रमा कार्यरत सहजकर्ताहरूको क्षमता अभिवृद्धि गर्ने उद्देश्यले सञ्चालन गरिएको १० दिने तालिम आज सम्पन्न भएको छ। गाउँपालिकाको शिक्षा शाखाको आयोजनामा सञ्चालन गरिएको उक्त तालिममा चौकुने गाउँपालिका वडा न १ देखि १० वडाका बालविकास सहजकर्ताहरूको सक्रिय सहभागिता रहेको थियो।

तालिममा बालबालिकाको समग्र विकासका लागि आवश्यक पर्ने आधारभूत सीपहरू, बालमैत्री शिक्षण विधि, खेल्दै सिक्ने प्रविधि, कक्षाकोठा व्यवस्थापन, प्रारम्भिक मनोवैज्ञानिक विकास, तथा बालअधिकार सम्बन्धी विषयहरूमा सहजीकरण गरिएको थियो। सहभागीहरूले व्यवहारिक अभ्यासमार्फत सिकेका सीपहरूलाई आफ्ना केन्द्रमा प्रभावकारी रूपमा लागू गर्ने प्रतिबद्धता जनाएका छन्।

समापन कार्यक्रमका सभा- अध्यक्ष सामाजिक बिकास समिति संयोजक एवं वडा न ८ का वडा अध्यक्ष कमल जि सी ले प्रारम्भिक बालविकास नै शिक्षाको आधार भएकाले यस क्षेत्रमा काम गर्ने सहजकर्ताहरूको दक्षता अत्यन्त महत्वपूर्ण रहेको बताउनु भयो । उहाँले यस्ता तालिमहरूले बालबालिकाको सिकाइ उपलब्धिमा सकारात्मक प्रभाव पार्ने विश्वास व्यक्त गर्दै सिकेका ज्ञान र सीपलाई व्यवहारमा उतार्न आग्रह गर्नु भएको थियो ।

कार्यक्रममा चौकुने गाउँपालिका शिक्षा युवा तथा खेलकुद बिकास शाखाका शिक्षा अधिकृत शिब प्रसाद गौतमले बालविकास केन्द्रहरूको गुणस्तर सुधारका लागि निरन्तर प्रयास भइरहेको उल्लेख गर्दै आगामी दिनमा समेत यस्ता तालिमलाई प्राथमिकता दिइने र सहजकर्ताहरूलाई जिम्मेवारीपूर्वक आफ्नो भूमिकामा सक्रिय हुन अनुरोध गर्नु भएको थियो । तालिम अवधिभर अनुभवी प्रशिक्षक लली बाह्रघरेले विभिन्न विधि र माध्यमबाट सहजीकरण गर्दै सहभागीहरूले तालिम उपयोगी र व्यवहारिक रहेको प्रतिक्रिया दिँदै यसले आफ्नो पेशागत दक्षता अभिवृद्धिमा महत्वपूर्ण सहयोग पुगेको बताउनु भयो ।

स्थानीय स्तरमै गुणस्तरीय प्रारम्भिक शिक्षा प्रदान गर्ने लक्ष्यसहित सञ्चालन गरिएको यो तालिमले चौकुने गाउँपालिकामा बालविकास केन्द्रहरूको शैक्षिक स्तर सुधारमा टेवा पुग्ने अपेक्षा गरिएको छ।