काँग्रेसको कर्णाली प्रदेशस्तरीय चुनावी समीक्षा कार्यक्रम स्थगित

काठमाडौँ — नेपाली काँग्रेसले कर्णाली प्रदेशस्तरीय चुनावी समीक्षा कार्यक्रम हालका लागि स्थगित गरेको छ।

पार्टी केन्द्रीय कार्यालयका कार्यवाहक मुख्यसचिव कृष्णप्रसाद दुलालले मातहत निकायलाई परिपत्र पठाउँदै पूर्वनिर्धारित कार्यक्रम विशेष कारण देखाउँदै स्थगन गरिएको जानकारी गराएका हुन्।

परिपत्रअनुसार सातवटै प्रदेशमा निर्वाचन समीक्षा तथा १५औँ महाधिवेशनसम्बन्धी कार्यक्रम सञ्चालन गर्ने योजनाअन्तर्गत सुर्खेतमा वैशाख ११ गतेका लागि तय गरिएको कर्णाली प्रदेशस्तरीय कार्यक्रम अर्को सूचना नभएसम्मका लागि रोकिएको उल्लेख छ।

यसअघि पनि सुदूरपश्चिम प्रदेशको वैशाख ६ गतेका लागि तय गरिएको कार्यक्रम स्थगित गरिएको थियो। पार्टीले हालसम्म मधेश प्रदेश, गण्डकी प्रदेश, लुम्बिनी प्रदेश र बागमती प्रदेशमा समीक्षा कार्यक्रम सम्पन्न गरिसकेको छ भने कोशी प्रदेशमा कार्यक्रम बुधबारका लागि तय गरिएको छ।

स्थगित भएका दुई प्रदेशमध्ये कर्णाली र सुदूरपश्चिम दुवैमा नेतृत्व पूर्वसभापति शेरबहादुर देउवानिकट मानिने नेताहरूको जिम्मेवारीमा रहेको छ। कर्णालीमा ललितजंग शाही र सुदूरपश्चिममा वीरबहादुर बलायर सभापति रहेका छन्।

पार्टीभित्र देखिएको आन्तरिक मतभेद र प्रदेश नेतृत्वबाट अपेक्षित समन्वय नहुँदा कार्यक्रम प्रभावित भएको विश्लेषण गरिएको छ।

यसैबीच, चुनावी समीक्षा कार्यक्रमहरूमा पार्टी सभापति गगन थापालगायत शीर्ष नेतृत्वले सम्बोधन गर्दै आएका छन्।