अमेरिकाको लुइसियानामा गोलीकाण्ड: ८ बालबालिकाको मृत्यु

काठमाडौं — अमेरिकाको लुइसियाना राज्यस्थित श्रेभपोर्ट शहरमा भएको गोलीकाण्डमा १ देखि १४ वर्ष उमेर समूहका ८ जना बालबालिकाको मृत्यु भएको प्रहरीले जनाएको छ।

प्रहरीका अनुसार घटना स्थानीय समयअनुसार बिहान करिब ५ बजे भएको हो। एक जना बन्दुकधारीले १० जनामाथि अन्धाधुन्ध गोली प्रहार गरेका थिए। घटनापछि हमलाकारी चोरी गरिएको गाडी लिएर फरार भएका थिए।

प्रहरीले पछ्याउँदै उनलाई नियन्त्रणमा लिने क्रममा गोली हानी मारेको जनाएको छ। हमलाकारीको पहिचान शमार एल्किन्सका रूपमा गरिएको छ।

प्रारम्भिक अनुसन्धान अनुसार घटना घरेलु विवादसँग सम्बन्धित रहेको बताइएको छ। घटनास्थलहरू एकभन्दा बढी रहेका छन्, जसमा दुई घर वेस्ट ७९औं स्ट्रिटमा र अर्को घर ह्यारिसन स्ट्रिटमा रहेका छन्। प्रहरी पुगेपछि घरभित्र बालबालिकाहरू मृत अवस्थामा फेला परेका थिए।

श्रेभपोर्टका मेयरले घटनाप्रति गहिरो दुःख व्यक्त गर्दै परिवारहरू ठूलो पीडामा रहेको बताएका छन्। घाइतेहरूलाई अस्पताल लगिएको र सबैलाई पीडित परिवारका लागि प्रार्थना गर्न आग्रह गरिएको छ।

प्रहरी प्रमुखले यस घटनालाई अत्यन्तै दुःखद र अकल्पनीय बताएका छन्। घटनाबारे विस्तृत अनुसन्धान राज्य प्रहरीसँगको समन्वयमा भइरहेको छ।

स्थानीय जनप्रतिनिधिका अनुसार शहरमा हुने धेरैजसो अपराध घरेलु विवादसँग सम्बन्धित हुने गरेका छन्। यस एक घटनाले मात्र पनि हत्या दरमा उल्लेखनीय वृद्धि भएको जनाइएको छ।

राज्यका गभर्नर तथा अन्य उच्च अधिकारीहरूले घटनाप्रति दुःख व्यक्त गर्दै प्रभावित परिवारप्रति समवेदना प्रकट गरेका छन्।

प्रहरीले हमलाकारी एक्लैले घटना घटाएको विश्वास गरेको छ भने अनुसन्धान जारी रहेको जनाएको छ।