ट्रकको ठक्करबाट ट्राफिक प्रहरी निरीक्षक गम्भीर घाइते

काठमाडौँ । काठमाडौं उपत्यका ट्राफिक प्रहरी कार्यालयमा कार्यरत प्रहरी निरीक्षक अभय लामा ट्रकको ठक्करबाट गम्भीर घाइते भएका छन्।

आइतबार साँझ ड्युटि सकेर फुटुङ्गातर्फ जाँदै गर्दा उनी सवार मोटरसाइकललाई विपरीत दिशाबाट आएको ट्रकले ठक्कर दिएको हो। उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदी का अनुसार दुर्घटना बा.प्रा. ०२–०२९ प ९४१५ नम्बरको मोटरसाइकल र बा.प्रा. ०३–००१ ख १७१५ नम्बरको ट्रकबीच भएको हो।

दुर्घटनापछि घाइते लामालाई तत्काल टिचिङ अस्पताल लगिएको र थप उपचारका लागि बी एण्ड बी अस्पताल पठाइएको प्रहरीले जनाएको छ।

दुर्घटनामा उनको टाउको, छाती, अनुहार तथा शरीरका विभिन्न भागमा गम्भीर चोट लागेको अस्पतालले जनाएको छ। ट्रक र चालक मकवानपुर मनहरी गाउँपालिका–५ का ३८ वर्षीय आइतराम मोक्तानलाई प्रहरीले नियन्त्रणमा लिएको छ।

२०७२ सालमा प्रहरी सेवामा प्रवेश गरेका लामा खुला प्रतिस्पर्धाबाट प्रहरी सहायक निरीक्षक हुँदै हाल प्रहरी निरीक्षक पदमा कार्यरत छन्। उनी हाल काठमाडौं उपत्यका ट्राफिक प्रहरी कार्यालयको मानव स्रोत व्यवस्थापन शाखा, रामशाहपथमा कार्यरत रहेका छन्।