अनिवार्य तथा निःशुल्क शिक्षा ऐन २०७५ कार्यान्वयनका लागि वडा स्तरीय अभिमुखीकरण कार्यक्रम सम्पन्न

सुर्खेत। चौकुने गाउँपालिका वडा नं. ८ मा अनिवार्य तथा निःशुल्क शिक्षा ऐन २०७५ को कार्यान्वयन सम्बन्धी वडा स्तरीय अभिमुखीकरण कार्यक्रम सम्पन्न भएको छ।वडा नं. ८ का वडा अध्यक्ष तथा सामाजिक विकास समितिका संयोजक कमल जी.सी. को अध्यक्षतामा सम्पन्न कार्यक्रममा चौकुने गाउँपालिकाका शिक्षा शाखा प्रमुख टेकेन्द्र बुढा, कृषि शाखा प्रमुख लोकमणि जोशी तथा पशुपन्छी विकास शाखा प्रमुख डा. रुपेन्द्र यादव को विशेष उपस्थिति रहेको थियो। गुटु सामुदायिक सिकाइ केन्द्र, चौकुने–८ सुर्खेतको आयोजनामा सम्पन्न कार्यक्रममा अभिभावक, महिला समूहका प्रतिनिधि, शिक्षाप्रेमी तथा स्थानीय सरोकारवालाहरूको उल्लेखनीय सहभागिता रहेको थियो।

कार्यक्रममा अनिवार्य तथा निःशुल्क शिक्षा ऐन २०७५ का व्यवस्था, बालबालिकाको शिक्षा प्राप्त गर्ने अधिकार, अभिभावकको जिम्मेवारी तथा स्थानीय तहको भूमिकाबारे विस्तृत जानकारी गराइएको थियो। वक्ताहरूले विद्यालय उमेरका सबै बालबालिकालाई विद्यालयमा भर्ना गरी नियमित अध्ययनको वातावरण सिर्जना गर्न समुदाय, अभिभावक र स्थानीय तहबीच सहकार्य आवश्यक रहेकोमा जोड दिएका थिए।

शिक्षा शाखा प्रमुख टेकेन्द्र बुढाले शिक्षाको पहुँच र गुणस्तर अभिवृद्धिका लागि सबै पक्षको सक्रिय भूमिका आवश्यक रहेको बताउनुभयो। कृषि शाखा प्रमुख लोकमणि जोशी तथा पशुपन्छी विकास शाखा प्रमुख डा. रुपेन्द्र यादवले पनि शिक्षा सामाजिक तथा आर्थिक विकासको आधार भएकाले प्रत्येक बालबालिकालाई विद्यालयसम्म पुर्‍याउन सामूहिक प्रयास आवश्यक रहेको धारणा व्यक्त गर्नुभयो।कार्यक्रममा सहभागीहरूले शिक्षा क्षेत्रमा रहेका चुनौती, विद्यालय बाहिर रहेका बालबालिकाको पहिचान तथा शिक्षामा सबैको पहुँच सुनिश्चित गर्ने उपायबारे आफ्ना सुझाव राखेका थिए। कार्यक्रमले शिक्षा सम्बन्धी जनचेतना अभिवृद्धि गर्दै अनिवार्य तथा निःशुल्क शिक्षा ऐनको प्रभावकारी कार्यान्वयनमा टेवा पुग्ने विश्वास व्यक्त गरिएको थियो।