ओली र लेखकलाई हाजिर जमानीमा रिहा गर्ने निर्णय

 काठमाडौँ । सर्वोच्च अदालतको परमादेशअनुसार पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक लाई हाजिर जमानीमा रिहा गर्ने निर्णय गरिएको छ ।

जिल्ला प्रहरी परिसर काठमाडौँका अनुसार सरकारी वकिलको सहमतिमा ‘खोजी भएको बेला उपस्थित हुने’ सर्तमा दुवै जनालाई प्रहरी हिरासतबाट मुक्त गरिएको हो ।

भदौ २३ र २४ मा भएको घटनाको छानबिनका लागि गठित गौरीबहादुर कार्की नेतृत्वको आयोगले फौजदारी मुद्दामा अनुसन्धान गर्न सिफारिस गरेपछि उनीहरूलाई चैत १४ गते पक्राउ गरिएको थियो । त्यसपछि काठमाडौँ जिल्ला अदालतबाट तेस्रो पटक म्याद थप गरी प्रहरीले हिरासतमा राख्दै आएको थियो ।

यसबीच, बन्दीप्रत्यक्षीकरण रिटमाथि सुनुवाइ गर्दै सर्वोच्च अदालतले चैत २३ गते चौथो पटक म्याद नथप्न र अनुसन्धान पूरा नभए हिरासतमुक्त गरेर थप अनुसन्धान गर्न परमादेश जारी गरेको थियो । अदालतको आदेशअनुसार तेस्रो म्याद बुधबारसम्म मात्रै कायम थियो ।

सर्वोच्च अदालतका न्यायाधीश विनोद शर्मा र सुनिलकुमार पोखरेलको इजलासले चैत २५ पछि हिरासतमा नराख्न आदेश दिएको थियो । अदालतले अनुसन्धान अवधिमा मुद्दा दायर हुने वा नहुने निर्णय गर्न र सो सम्भव नभए मुलुकी फौजदारी कार्यविधि संहिता, २०७४ को दफा १५ अनुसार प्रक्रिया पूरा गरी रिहा गरेर थप अनुसन्धान गर्न निर्देशन दिएको थियो ।

मन्त्रिपरिषद्ले पनि कार्की आयोगको सिफारिस कार्यान्वयन गर्ने निर्णय गरेको थियो । सो घटनामा काठमाडौँको बानेश्वर क्षेत्रमा भएको प्रदर्शनका क्रममा प्रहरीको गोली लागेर किशोरहरूको मृत्यु भएको थियो । उक्त घटनाका बेला ओली प्रधानमन्त्री र लेखक गृहमन्त्री रहेका थिए ।

स्वास्थ्य समस्याका कारण ओलीलाई त्रिवि शिक्षण अस्पतालमा राखिएको थियो भने लेखकलाई महाराजगञ्जस्थित सशस्त्र प्रहरी बलको गणमा राखिएको थियो । घटनाबारे थप अनुसन्धान जारी रहेको प्रहरीले जनाएको छ ।