आज तीन प्रदेशमा चट्याङ्गसहित वर्षाको सम्भावना

काठमाडौँ । देशभर हाल पश्चिमी न्यून चापीय प्रणाली तथा स्थानीय वायुको प्रभावका कारण मौसम बदली रहेको छ । जल तथा मौसम पूर्वानुमान महाशाखाका अनुसार बागमती, गण्डकी र लुम्बिनी प्रदेशका विभिन्न स्थानमा चट्याङ्गसहित वर्षा हुने सम्भावना रहेको छ ।

महाशाखाले जनाएको छ कि कोशी प्रदेशका पहाडी क्षेत्रसहित कर्णाली र सुदूरपश्चिम प्रदेशका केही स्थानमा पनि मेघगर्जन र चट्याङ्गसहित हल्का देखि मध्यम वर्षा भइरहेको छ ।

आज दिउँसो कोशी प्रदेशलगायत देशका पहाडी तथा हिमाली भू–भागमा सामान्यदेखि पूर्ण बदली रहनेछ भने अन्य क्षेत्रहरूमा आंशिक बदली रहने अनुमान गरिएको छ । यस क्रममा पहाडी तथा हिमाली क्षेत्रका केही स्थानका साथै मधेश प्रदेशका एक–दुई स्थानमा चट्याङ्गसहित मध्यम वर्षा वा हिमपात हुन सक्ने सम्भावना रहेको छ ।

त्यसैगरी, आज राति पनि कोशी प्रदेशसहित हिमाली क्षेत्रमा सामान्य बदली कायम रहनेछ । पहाडी क्षेत्रमा आंशिक बदली रहने र तराई क्षेत्रमा भने मौसम मुख्यतया सफा रहने महाशाखाले जनाएको छ ।

कोशी र गण्डकी प्रदेशका पहाडी तथा हिमाली क्षेत्रका केही स्थानमा तथा अन्य हिमाली क्षेत्रमा एक–दुई स्थानमा मेघगर्जन र चट्याङ्गसहित हल्का वर्षा वा हिमपातको सम्भावना रहेको छ ।

महाशाखाले वर्षा तथा हिमपात हुन सक्ने क्षेत्रका सर्वसाधारण, यात्रु तथा सवारी चालकलाई आवश्यक सतर्कता अपनाउन आग्रह गरेको छ ।