सुर्खेतकाे बबई नाकामा कुकुरसहित प्रहरीको विशेष चेकिङ

 सुर्खेत — लागुऔषध, अवैध हातहतियार तथा विस्फोटक पदार्थको ओसारपसार नियन्त्रण गर्न सुर्खेतको भेरीगंगा नगरपालिका–५ स्थित बबई चेकप्वाइन्टमा प्रहरीले विशेष चेकिङ अभियान सञ्चालन गरेको छ।

इलाका प्रहरी कार्यालय छिन्चु र ट्राफिक प्रहरीसहित ९ जना तथा केनाइन शाखा कोहलपुर, बाँकेबाट खटिएको ५ जनाको टोली गरी कुल १४ जनाको संयुक्त टोलीले उक्त चेकिङ गरेको प्रहरीले हो।

अभियानमा कोहलपुरबाट ल्याइएका दुईवटा तालिम प्राप्त ‘स्निफर’ कुकुरको प्रयोग गरिएको थियो। सवारी साधन र यात्रुको गहन जाँच गरी सम्भावित अवैध गतिविधि नियन्त्रणमा ध्यान केन्द्रित गरिएको प्रहरीले जनाएको छ।

दिउँसो २:३० बजे सुरु भएको चेकिङ करिब दुई घण्टापछि ४:३० बजे सम्पन्न भएको थियो।

सुरक्षा निकायले चाडपर्व तथा विशेष समयमा यस्ता कुकुरसहितको चेकिङलाई थप प्रभावकारी बनाउँदै आएको जनाएको छ।