मोटरसाइकल ठोक्किँदा आगलागी:  तीन विद्यार्थीको मृत्यु

महोत्तरी — जलेश्वर–बर्दिबास सडकखण्डअन्तर्गत बथनाहा गाउँमा दुई मोटरसाइकल एकआपसमा ठोक्किँदा आगलागी भई तीन विद्यार्थीको जलेर मृत्यु भएको छ।

जिल्ला प्रहरी कार्यालयका प्रहरी नायब उपरीक्षक शैलेन्द्र भट्टका अनुसार दुर्घटनामा थप तीन जना गम्भीर घाइते भएका छन्। उनीहरूको जलेश्वरस्थित प्रादेशिक अस्पतालमा उपचार भइरहेको छ।

प्रहरीका अनुसार विपरीत दिशाबाट आएका मोटरसाइकल एकडारा गाउँपालिका–५ मा ठोक्किँदा दुवैमा आगो लागेको हो। आगलागीका कारण तीन विद्यार्थीको घटनास्थलमै मृत्यु भएको जनाइएको छ।

मृतक र घाइतेको पहिचान खुल्न नसकेको तथा मोटरसाइकल पूर्ण रूपमा जलेर नम्बर प्लेटसमेत नदेखिने अवस्थामा रहेको प्रहरीले जनाएको छ। मृतकहरू एसइई परीक्षा दिएर फर्किरहेका विद्यार्थी रहेको बताइएको छ।