खामेनी मारिएको अमेरिकी दाबीपछि इरानमा उत्सव मनाइँदै

काठमाडौं – संयुक्त राज्य अमेरिकाले इरानका सर्वोच्च नेता अयातोल्लाह अली खामेनी हवाई आक्रमणमा मारिएको दाबी गरेपछि इरानका विभिन्न स्थानमा उत्सव मनाइएको भन्ने खबरहरू सार्वजनिक भएका छन्।

यद्यपि इरानका कुनै पनि आधिकारिक निकायले हालसम्म खामेनीको मृत्युबारे पुष्टि वा खण्डन गरेका छैनन्। यसले घटनाबारे अन्योल कायम रहेको छ।

इरानी अधिकारकर्मी तथा पत्रकार माइस एलिनेजाडले सामाजिक सञ्जालमार्फत केही व्यक्तिहरूले खुसीयाली मनाइरहेको भिडियो सार्वजनिक गरेकी छन्। उनले “के म सपना देखिरहेकी छु ? नयाँ संसारलाई नमस्कार” भन्ने सन्देशसहित पोस्ट साझा गरेकी थिइन्। अर्को भिडियोमा उनले वर्षौंदेखि नागरिकहरूले दुःखद खबर सुन्दै आएको उल्लेख गर्दै यसपटक फरक परिस्थिति देखिएको टिप्पणी गरेकी छन्।

यसअघि निर्वासित इरानी युवराज रेजा पहलाभीले खामेनीको मृत्यु पुष्टि भएमा इरानीहरूलाई “स्वतन्त्र र समृद्ध भविष्यका लागि स्थिर संक्रमण” को पक्षमा एकजुट हुन आह्वान गरेका थिए। उनले वर्तमान शासनले उत्तराधिकारी नियुक्त गर्ने प्रयास सफल नहुने दाबी पनि गरेका छन्।

उता अमेरिकी राष्ट्रपति डोनाल्ड ट्रम्पले सामाजिक सञ्जालमार्फत खामेनी मारिएको दाबी गर्दै यसलाई “इरानका जनताका लागि मात्र नभई विश्वभर पीडित मानिसहरूका लागि न्याय” भनेका छन्। उनले इजरायलसँगको सहकार्यमा कारबाही भएको संकेत गर्दै मध्यपूर्वमा शान्ति स्थापना नभएसम्म अभियान जारी रहने चेतावनी दिएका छन्।

तर इरानका आधिकारिक स्रोतहरूले खामेनीको अवस्थाबारे कुनै स्पष्ट जानकारी सार्वजनिक नगरेकाले परिस्थिति अझै अनिश्चित रहेको छ। मृत्यु पुष्टि भएमा उत्तराधिकार, आन्तरिक राजनीतिक अवस्था तथा पश्चिम एसियाको सुरक्षा सन्तुलनमा पर्ने प्रभावबारे विभिन्न अड्कलबाजी भइरहेका छन्।