चन्द्रसूर्य एकेडेमीको २३औँ वार्षिक उत्सव भव्य रूपमा सम्पन्न

वीरेन्द्रनगर ।  कर्णाली प्रदेशको राजधानी वीरेन्द्रनगरस्थित चन्द्रसूर्य एकेडेमीले आफ्नो स्थापनाको २३औँ वर्ष प्रवेशको अवसरमा शुक्रबार ‘२३औँ वार्षिक उत्सव तथा अभिभावक दिवस’ भव्य समारोहका साथ सम्पन्न गरेको छ। वीरेन्द्रनगर–४ मा रहेको विद्यालयको आफ्नै प्राङ्गणमा आयोजित कार्यक्रममा शिक्षा, राजनीति तथा कला क्षेत्रका व्यक्तित्वहरूको उपस्थिति रहेको थियो।

कार्यक्रमका प्रमुख अतिथि कर्णाली प्रदेशका सामाजिक विकास मन्त्री **घनश्याम भण्डारी**ले पानसमा दीप प्रज्ज्वलन गरी उत्सवको समुद्घाटन गर्नुभएको थियो। समारोहलाई सम्बोधन गर्दै मन्त्री भण्डारीले विद्यालयले दुई दशकभन्दा लामो समयदेखि सुर्खेतको शैक्षिक विकासमा पुर्‍याएको योगदानको उच्च प्रशंसा गर्नुभयो। निजी क्षेत्रका शैक्षिक संस्थाहरूले गुणस्तरीय र प्रतिस्पर्धी शिक्षा प्रदान गर्दै दक्ष जनशक्ति उत्पादनमा महत्वपूर्ण भूमिका खेलेको उल्लेख गर्दै उहाँले प्रदेश सरकारले पनि शैक्षिक सुधारका लागि विभिन्न नीतिगत तथा संरचनात्मक योजना अघि सारेको जानकारी दिनुभयो।

उत्सवको अर्को विशेष आकर्षणका रूपमा राष्ट्रिय स्तरका वरिष्ठ कलाकार **प्रेम देव गिरि**को उपस्थिति रहेको थियो। कलाकार गिरिले विद्यार्थीहरूलाई किताबी ज्ञानसँगै आफ्नो कला, संस्कृति र मौलिकतालाई जोगाउन प्रेरित गर्नुभयो। उहाँको उपस्थितिले कार्यक्रमलाई थप ऊर्जा प्रदान गरेको आयोजकहरूले बताएका छन्।

समारोहमा विद्यालयका स–साना विद्यार्थीहरूले विभिन्न जातजातिका भेषभूषामा सजिएर मौलिक लोकनृत्य, गीत तथा सन्देशमूलक नाटक प्रस्तुत गरेका थिए। उनीहरूको आकर्षक प्रस्तुतिले उपस्थित अभिभावक र अतिथिहरूलाई मन्त्रमुग्ध बनाएको थियो।

कार्यक्रमको दौरान विद्यालय व्यवस्थापन समितिले २३ वर्षको गौरवमय यात्रामा साथ र सहयोग गर्ने सम्पूर्ण अभिभावक, शिक्षक तथा शुभचिन्तकप्रति आभार व्यक्त गर्दै मायाको चिनो प्रदान गरेको थियो। साथै आगामी दिनमा विद्यालयलाई अझ प्रविधिमैत्री, व्यावहारिक र गुणस्तरीय शिक्षातर्फ उन्मुख गराउने प्रतिबद्धता समेत जनाइएको थियो।