अब आन्तरिक एकतालाई बलियो बनाएर जानुपर्ने देउवा पक्षको जोड

काठमाडौं । नेपाली कांग्रेस का निवर्तमान सभापति शेरबहादुर देउवा पक्षका नेताहरूले पार्टीभित्र आन्तरिक एकता सुदृढ बनाउनुपर्नेमा जोड दिएका छन्।

आइतबार काठमाडौंमा बसेको १४औँ महाधिवेशनबाट निर्वाचित सदस्यहरूको छलफलमा सर्वोच्च अदालतले पार्टी विवादसम्बन्धी फैसला गरिसकेको अवस्थामा अब एकतामा केन्द्रित हुनुपर्ने धारणा व्यक्त गरिएको हो।

नेता कुन्दनराज काफ्ले ले वर्तमान परिस्थितिमा सानेपाबाटै सबै पक्षलाई मिलाएर नेतृत्वदायी भूमिका निर्वाह गर्नुपर्ने बताए। उनका अनुसार विशेष महाधिवेशनमा सहभागी नभएका निवर्तमान सदस्यहरूबीच पनि निरन्तर छलफल गर्दै पार्टीलाई अघि बढाउने विषयमा निर्णय लिने तयारी भइरहेको छ।

बैठकमा पार्टीको अघिल्लो अवस्थाको समीक्षा, निर्वाचनमा पराजयका कारण तथा आगामी रणनीतिबारे समेत छलफल भएको जनाइएको छ।