नागढुङ्गाबाट १२ लाखभन्दा बढी मूल्यको चाँदीसहित किशोर पक्राउ

काठमाडौं । काठमाडौंको चन्द्रागिरी नगरपालिका–२ स्थित नागढुङ्गा चेकप्वाइन्टबाट प्रहरीले ठूलो परिमाणमा अवैध चाँदीसहित एक किशोरलाई पक्राउ गरेको छ।

वीरगन्जबाट काठमाडौंतर्फ आउँदै गरेको बा प्र ०१–००६ ख ५५२९ नम्बरको यात्रुवाहक बस जाँच गर्ने क्रममा करिब १२ लाख १४ हजार ५२० रुपैयाँ बराबरको चाँदी बरामद गरिएको प्रहरीले जनाएको छ।

प्रहरी प्रभाग नागढुङ्गा र लागू औषध नियन्त्रण ब्यूरो शाखा कार्यालय नागढुङ्गाको संयुक्त टोलीले मंगलबार अपराह्न ४ बजे नियमित चेकजाँचका क्रममा उक्त चाँदी फेला पारेको हो।

पक्राउ पर्नेमा पर्सा फेटा गाउँपालिका–६ बस्ने १७ वर्षीय आशु श्राब रहेका छन्। प्रहरीले उनका साथबाट २ केजी ९०० ग्राम चाँदीका दाना बरामद गरेको जनाएको छ। उक्त चाँदी कालो रङको झोलाभित्र सेतो प्लास्टिकले बेरेर लुकाइछिपाइ ल्याइएको अवस्थामा फेला परेको थियो।

पक्राउ परेका किशोरलाई बरामद चाँदीसहित थप अनुसन्धान तथा आवश्यक कारबाहीका लागि त्रिभुवन विमानस्थल भन्सार कार्यालय, गौचर पठाइएको प्रहरीले जानकारी दिएको छ।