मादक पदार्थ सेवन गरी स्कुल बस चलाउने पाँच चालक प्रहरी नियन्त्रणमा

काठमाडौँ — कास्की जिल्ला मा विभिन्न बोर्डिङ तथा विद्यालयका बस चालकले मादक पदार्थ सेवन गरी सवारी चलाएको अवस्थामा पाँच जनालाई प्रहरीले नियन्त्रणमा लिएको छ।

स्थानीय सुरक्षा निकायका अनुसार विद्यार्थी बोकेको बसका चालकहरूले मादक पदार्थ सेवन गरेर सवारी सञ्चालन गरेको गुनासो प्राप्त भएपछि विशेष निगरानी र चेकजाँच अभियान सञ्चालन गरिएको थियो। सोही क्रममा उनीहरूलाई नियन्त्रणमा लिइएको जनाइएको छ।

नियन्त्रणमा परेका चालकहरूमा आनन्द परियार (माउन्ट हेभन बोर्डिङ स्कुल), गौतम गुरुङ (कुमुदिनी होम्स बोर्डिङ), भक्तबहादुर गुरुङ (विन्देश्वरी स्कुल), डम्बरबहादुर गुरुङ (अंजली बोर्डिङ) तथा पदम विक (एसओएस बोर्डिङ स्कुल) रहेका छन्।

प्रहरीले नियन्त्रणमा लिएका चालकहरूमाथि सवारी तथा यातायातसम्बन्धी प्रचलित कानुनअनुसार कारबाही प्रक्रिया अघि बढाइएको जनाएको छ। विद्यार्थीको सुरक्षालाई ध्यानमा राख्दै यस्ता निगरानी अभियानलाई निरन्तरता दिइने पनि प्रहरीले जनाएको छ।