बलिउड अभिनेता रणवीर सिंहलाई ज्यान मार्ने धम्की

काठमाडौँ। बलिउड अभिनेता रणवीर सिंहलाई ज्यान मार्ने धम्की प्राप्त भएपछि मुम्बई प्रहरीले सुरक्षा व्यवस्था कडा बनाएको छ। भारतीय सञ्चारमाध्यमहरूका अनुसार रणवीर सिंहलाई वट्सएपमार्फत एक धम्कीपूर्ण भ्वाइस नोट पठाइएको हो।

धम्की प्राप्त हुनासाथ मुम्बई प्रहरी रणवीर सिंहको बाँद्रा स्थित निवास बाहिर अतिरिक्त सुरक्षाकर्मी परिचालन गर्दै सतर्क बनेको छ। प्रहरी अधिकारीहरूका अनुसार उक्त भ्वाइस नोटमा धम्की दिने व्यक्तिले आफू गम्भीर आपराधिक गतिविधिसँग संलग्न रहेको दाबी गर्दै ठूलो रकम नदिए कडा परिणाम भोग्नुपर्ने चेतावनी दिएको छ। सो भ्वाइस नोटलाई फरेन्सिक परीक्षणका लागि पठाइएको छ।

यो घटना हालै चलचित्र निर्देशक रोहित शेट्टीको मुम्बईस्थित निवास बाहिर जनवरी ३१ मा पाँच राउन्ड फायरिङ भएको घटनापछि आएको हो। उक्त घटनापछि मुम्बई प्रहरी उच्च सतर्कतामा रहेको बताइएको छ।

मुम्बई प्रहरीको साइबर सेल र क्राइम ब्राञ्चले संयुक्त रूपमा वट्सएप नम्बर र भ्वाइस स्याम्पलको आधारमा आरोपीको पहिचान र लोकेसन पत्ता लगाउने प्रयास गरिरहेका छन्। प्रारम्भिक अनुसन्धानमा धम्की दिने व्यक्ति कुनै आपराधिक गिरोहसँग सम्बन्धित हुन सक्ने आशंका गरिएको छ।

प्रहरीले रणवीर सिंहलाई आएको धम्की र रोहित शेट्टीको घरमा भएको फायरिङ घटनाबीच कुनै प्रत्यक्ष सम्बन्ध छ वा यो केवल आतंक फैलाउने उद्देश्यले गरिएको कार्य हो भन्ने विषयमा समेत अनुसन्धान अघि बढाएको जनाएको छ।

यसैबीच, रणवीर सिंह हालै रिलिज भएको फिल्म ‘धुरन्धर’ को सफलताका कारण चर्चामा छन्। उक्त फिल्मले बक्स अफिसमा उत्कृष्ट प्रदर्शन गर्नुका साथै रणवीरको करियरमा महत्वपूर्ण सफलता हासिल गरेको बताइएको छ। एक्सन, ड्रामा र भावनाले भरिएको फिल्ममा रणवीरको सशक्त अभिनयलाई दर्शक तथा समीक्षकले खुलेर प्रशंसा गरेका छन्।

फिल्ममा रणवीर सिंहले परिस्थितिसँग जुध्दै प्रणालीविरुद्ध उभिने पात्रको भूमिका निर्वाह गरेका छन्। उनको अभिनय, बडी ल्याङ्ग्वेज र संवाद प्रस्तुतिलाई दर्शकले निकै मन पराएका छन्। फिल्मको सफलतापछि अब दर्शकको ध्यान सम्भावित सिक्वेल ‘धुरन्धर २’ तर्फ केन्द्रित भएको छ। रिपोर्टअनुसार निर्माता पक्षले सिक्वेललाई अझ ठूलो स्तरमा निर्माण गर्ने तयारी गरिरहेको छ।