उत्तरपूर्वी कोलम्बियामा विमान दुर्घटना: १५ जनाको मृत्यु

काठमाडौं । उत्तरपूर्वी कोलम्बियाको नोर्टे डे सान्टान्डर प्रान्तको एक ग्रामीण क्षेत्रमा विमान दुर्घटनाग्रस्त हुँदा विमानमा सवार सबै १५ जनाको मृत्यु भएको छ।

स्थानीय अधिकारीहरूका अनुसार दुर्घटनाग्रस्त विमान सरकारी स्वामित्वको एयरलाइन्स ‘सटेनाआ’ (Satena) को हो। दुर्घटनाको जानकारी प्राप्त हुनासाथ उद्धार टोली घटनास्थलमा पठाइएको भए पनि कोलम्बियाली यातायात मन्त्रालयले विमानमा सवार कुनै पनि यात्रु वा चालक दलका सदस्य जीवित नभएको पुष्टि गरेको छ।

रिपोर्टअनुसार स्थानीय समय अनुसार बुधबार बिहान ११:४२ बजे कुकुटा शहरको विमानस्थलबाट उडेको उक्त विमान उडान सुरु गरेको केही समयमै हवाई ट्राफिक नियन्त्रणसँग सम्पर्कविहीन भएको थियो। विमान पहाडी क्षेत्र हुँदै ओकान्या शहरतर्फ गइरहेको थियो, जहाँ पुग्न सामान्यतया करिब ४० मिनेट लाग्ने गर्दछ।

दुर्घटनाका समयमा विमानमा २ जना चालक दलका सदस्य र १३ जना यात्रु गरी जम्मा १५ जना सवार थिए। मृतक यात्रुहरूमध्ये एक डायोजेनेस क्विन्टेरो रहेका छन्, जो आफ्नो क्षेत्रमा आन्तरिक सशस्त्र द्वन्द्वका पीडितहरूको प्रतिनिधित्व गर्ने प्रमुख व्यक्ति थिए। उनको निधनले स्थानीय समुदायमा गहिरो शोक र चिन्ता उत्पन्न गरेको जनाइएको छ।

विमान दुर्घटनाको कारण हालसम्म खुल्न सकेको छैन। सम्बन्धित निकायले घटनाबारे विस्तृत अनुसन्धान सुरु गरेको जनाएको छ।