जेल ‘युनिफर्म’मै कैदीसँग सम्बन्धः पूर्व जेल अधिकारीलाई तीन वर्षको जेल सजाय

काठमाडौं — कैदीसँग अवैध यौन सम्बन्ध तथा जेल सुरक्षासम्बन्धी गम्भीर अपराध गरेको आरोपमा बेलायतकी एक पूर्व जेल अधिकारीलाई तीन वर्षको जेल सजाय सुनाइएको छ।

बेलायतको नर्थह्याम्प्टनशायरस्थित वेलिंगबरोमा रहेको एचएमपी फाइभ वेल्स जेलमा कार्यरत रहेकी एलिसिया नोभासलाई कैदीसँग यौन सम्बन्ध राख्नुका साथै जेल सुरक्षालाई जोखिममा पार्ने गतिविधि गरेको अभियोगमा उक्त सजाय सुनाइएको हो।

अदालतका अनुसार नोभासले कैदी डेक्लान विंकलेससँग व्यक्तिगत सम्बन्ध राख्दै आफ्नो व्यक्तिगत फोन नम्बर दिएकी थिइन्। जुलाई २०२४ मा १८ वर्षको उमेरमै जेल अधिकारीको रूपमा काम सुरु गरेकी नोभास र ३१ वर्षीय विंकलेसबीच अगस्ट २०२४ देखि मार्च २०२५ सम्म करिब तीन हजार पटक फोन, मेसेज तथा भिडियो कलमार्फत सम्पर्क भएको खुलेको छ।

विंकलेसले जेलभित्र चारवटा अवैध मोबाइल फोन प्रयोग गरेको र नोभासले उनका लागि गाँजा तथा दुईवटा मोबाइल फोन तस्करी गरेको अदालतले जनाएको छ। यति मात्र होइन, नोभासले जेलका एक सूचनादाताको नाम तथा जेल प्रशासनले विंकलेसबारे राखेको जानकारी समेत गोप्य रूपमा दिएको ठहर अदालतले गरेको छ। यसले सूचनादाताको ज्यान जोखिममा पार्नुका साथै जेलको समग्र सुरक्षा प्रणाली कमजोर बनाएको निष्कर्ष निकालिएको छ।

अदालतमा प्रस्तुत प्रमाणअनुसार उनीहरूबीचको सम्बन्ध नोभेम्बर ६, २०२४ मा फोन नम्बर साटासाटबाट सुरु भई नोभेम्बर १६ सम्म यौन सम्बन्धमा परिणत भएको थियो। विंकलेसले नोभासप्रति रोमान्टिक रुचि देखाउँदै महँगो उपहार प्रस्ताव गरेको सन्देशहरू पनि भेटिएका छन्।

सजाय सुनाउँदै न्यायाधीश रेबेका क्रेनले नोभासले जेलको युनिफर्म लगाएकै अवस्थामा यौन सम्पर्क गरेको दुईवटा भिडियो विंकलेसले स्न्यापच्याटमार्फत सेयर गरेको उल्लेख गरिन्। ती भिडियो पछि सार्वजनिक भई मिडियामा पुगेका थिए।

न्यायाधीश क्रेनले नोभासले आफ्नो व्यवहारको गम्भीरता नबुझेको भन्दै यसले जेल कर्मचारी, कैदी तथा समग्र सुरक्षामा गम्भीर खतरा उत्पन्न गरेको बताइन्। यद्यपि, उनको कम उमेर र अनुभवको कमीका कारण उनी सजिलै प्रभावमा परेको पक्षलाई समेत अदालतले उल्लेख गरेको छ।

नोभासको पक्षबाट बहस गर्दै वकिल लियाम मुइरले उनी भावनात्मक रूपमा अस्थिर व्यक्तित्वकी भएको र अपराधको समयमा त्यसको औपचारिक निदान नभएको दाबी गरे।

यसै घटनामा संलग्न कैदी डेक्लान विंकलेस, जो चोरी तथा लुटपाटसम्बन्धी मुद्दामा पहिले नै ११ वर्ष तीन महिनाको सजाय भोगिरहेका थिए, उनलाई पनि थप तीन वर्ष चार महिनाको जेल सजाय सुनाइएको छ। उक्त सजाय उनको पुरानो सजायसँगै निरन्तर रूपमा लागू हुने अदालतले जनाएको छ।

दुवै प्रतिवादी सोमबार एचएमपी पिटरबरोबाट भिडियो लिंकमार्फत अदालतमा उपस्थित भएका थिए। नोभासले मिसकन्डक्ट इन पब्लिक अफिससहित कुल छ वटा अभियोगमा अपराध स्वीकार गरेकी छिन्। एजेन्सीको सहयोगमा