सुर्खेतकाे भरीगंगामा मिनि ट्रक र फोर्स गाडी ठोक्किँदा ६ जना घाइते

सुर्खेत। सुर्खेतको भेरीगंगा नगरपालिका–५, एमालेमोड नजिक सुर्खेत–नेपालगञ्ज सडक खण्डमा भएको सवारी दुर्घटनामा ६ जना घाइते भएका छन्।

मंगलबार दिउँसो करिब १:४५ बजे नेपालगञ्जतर्फ जाँदै गरेको क.प्र.०२–००१ ख ०९२२ नं को फोर्स गाडी र विपरीत दिशाबाट आउँदै गरेको भे१ प १६८५ नं को मिनि ट्रक आपसमा ठोक्किँदा दुर्घटना भएको हो। घटनामा फोर्स गाडीका चालकसहित ६ जना घाइते भएको प्रहरीले जनाएको छ।

दुर्घटनापछि प्रहरी चौकी बबईका प्रहरी सहायक निरिक्षक हरी बहादुर तिरुवाको कमाण्डमा ट्राफिकसहितको पाँच जनाको टोलीले उद्धारकार्य गरी घाइतेलाई उपचारका लागि कोहलपुर पठाइएको इलाका प्रहरी कार्यालय बबईले जानकारी दिएको छ।

प्रहरीका अनुसार घाइतेहरुको परिचय भने अझै खुल्न बाँकी छ। यस्तै, दुर्घटनामा संलग्न मिनि ट्रक र चालकलाई नियन्त्रणमा लिइएको र सडकमा कुनै अवरोध नभएको प्रहरीले जनाएको छ।