सुर्खेतमा जुवातास खेल्दै गरेका ७ जना जुवाडे पक्राउ

बिरेन्द्रनगर। सुर्खेतको बिरेन्द्रनगर–६ स्थित सन्देश रावतले सञ्चालन गरेको टास्किङ होटलमा जुवातास खेलिरहेको अवस्थामा सात जनालाई प्रहरीले पक्राउ गरेको छ। बिहिबार साँझ ७:३० बजे प्रहरी नायब निरीक्षक राजन भट्टराईको कमाण्डमा खटिएको टोलीले होटलमा छापा मार्दा रु.६० हजार नगदसहित उनीहरूलाई नियन्त्रणमा लिएको हो।

जिल्ला प्रहरी कार्यालय सुर्खेतका अनुसार पक्राउ पर्नेमा बिरेन्द्रनगर–६ का ३० वर्षीय देवेन्द्र अधिकारी, साेहि वडाका ३४ वर्षीय धर्म भण्डारी, २० वर्षीय तिलक प्रसाद पौडेल, वडा नम्बर- ४ का ३१ वर्षीय गणेश खड्का, ३३ वर्षीय टेक बहादुर गिरी, वडा नम्बर- ८ का ३१ वर्षीय रविन्द्र थापा र वडा नम्बर-६ का ३२ वर्षीय तेजराम पाण्डे रहेका छन्।

पक्राउ परेकालाई थप अनुसन्धानका लागि जिल्ला प्रहरी कार्यालय सुर्खेतमा राखिएको प्रहरीले जनाएको छ।