आजको मौसमी पूर्वानुमान

२७ भदौ — मौसम पूर्वानुमान महाशाखाले आज देशभर साधारणतया बदली रहने जनाएको छ। हाल मनसुनको न्यून चापीय रेखा पूर्वमा सरदर स्थान वरपर र पश्चिममा सरदरभन्दा केही उत्तरतिर अवस्थित रहेको छ।

महाशाखाका अनुसार हाल मधेश प्रदेश, बागमती प्रदेश, गण्डकी प्रदेश र लुम्बिनी प्रदेशका एक–दुई स्थानमा हल्का देखि मध्यम वर्षा भइरहेको छ। दिउँसो पनि देशभर आंशिकदेखि पूर्ण बदली रहने अनुमान छ।

कोशी, मधेश, बागमती, गण्डकी र लुम्बिनी प्रदेशका साथै देशका पहाडी भूभागका धेरै स्थानहरूमा र तराई भूभागका केही ठाउँमा मध्यम वर्षा हुने सम्भावना रहेको महाशाखाले जनाएको छ। यस्तै, मधेश प्रदेशसँगै कोशी, बागमती, गण्डकी र लुम्बिनी प्रदेशको पहाडी भूभागका एक–दुई स्थानमा भने भारी वर्षा हुने सम्भावना छ।

आगामी २४ घण्टामा पनि यी प्रदेशका पहाडी भूभागमा भारी वर्षाको सम्भावना रहेकाले सतर्क रहन महाशाखाले सर्वसाधारणलाई आग्रह गरेको छ। महाशाखाले पछिल्लो मौसमी सूचनाको जानकारी समयमै लिन पनि सरोकारवालाहरूलाई अनुरोध गरेको छ।