बाँकेको बाल सुधार गृहमा झडप : ५ को मृत्यु, २ घाइते

बाँके। बाँकेको नौबस्तास्थित बाल सुधार गृहमा गएराति भएको झडपमा पाँच जनाको ज्यान गएको छ भने दुई जना घाइते भएका छन्।

मृत्यु हुनेमा दैलेखका भुपेन्द्र खत्री, बाँकेका समीर थापा, अछामका उमेश विष्ट, कैलालीका जगत देउवा र दाङका दिनेश घर्तीमगर रहेका छन्।

झडपका क्रममा घाइते भएका सात जनामध्ये पाँच जनालाई उपचारका लागि नेपालगञ्जस्थित भेरी अस्पताल ल्याइएका थिए। तर, चिकित्सकले सबैलाई मृत घोषणा गरेका थिए। उनीहरूको प्रायः टाउकोमा गम्भीर चोट लागेको अस्पताल स्रोतले जनाएको छ।

सुधार गृहमा रहेका युवाहरूले देशभर चर्किएको जेन जी आन्दोलनको प्रभावमा भाग्ने प्रयास गर्दा प्रहरी र सुरक्षा निकायले रोक्न खोजेपछि घटना बढेको बताइएको छ। सो क्रममा कैदीबालक र प्रहरीबीच झडप भएको थियो।

हाल दुई जना घाइतेको भेरी अस्पतालमा उपचार भइरहेको छ भने केही युवा सुधार गृहबाट भाग्न सफल भएको र केही भित्रै रहेका जिल्ला प्रहरी कार्यालय बाँकेले जनाएको छ।