काठमाडौंमा कर्फ्यु सकियो, सुरक्षा समितिको बैठकपछि थप निर्णय हुने

काठमाडौं । जिल्ला प्रशासन कार्यालय काठमाडौंले हिजोदेखि लागू गरेको कर्फ्यु आदेश आज बिहान ५ बजे सकिएको छ। अहिले राजधानीका सडकमा सवारीसाधन फाट्टफुट्ट चलिरहेका छन् भने सफाइकर्मीहरू नियमित सरसफाइमा खटिएका छन्।

सामाजिक सञ्जालमाथिको प्रतिबन्ध र भ्रष्टाचारविरुद्ध प्रदर्शनका क्रममा हिजो प्रहरीले चलाएको गोली लागेर १९ जनाको ज्यान गएको थियो। प्रदर्शन नियन्त्रण गर्ने क्रममा उत्पन्न परिस्थितिपछि जिल्ला प्रशासन कार्यालयले हिजो मध्याह्नदेखि कर्फ्यु आदेश जारी गरेको थियो।

प्रशासनले त्यसलाई बढाउँदै आज बिहान ५ बजेसम्म लम्ब्याएको भए पनि कर्फ्यु थप लम्ब्याइने वा पूर्ण रूपमा हटाइनेबारे औपचारिक जानकारी अझै दिइएको छैन। प्रमुख जिल्ला अधिकारीदेखि प्रवक्तासम्म कसैले फोन उठाउन नसकेको कारण आधिकारिक धारणा बाहिर आएको छैन।

जिल्ला प्रशासन कार्यालयका एक अधिकारीका अनुसार आजै जिल्ला सुरक्षा समितिको बैठक बसेर थप निर्णय हुने छ।