सरकारकाे तीन तहबीच सम्बन्ध सुदृढ गर्न आवश्यक : मुख्यमन्त्री कँडेल

सुर्खेत । कर्णाली प्रदेशका मुख्यमन्त्री यामलाल कँडेलले सङ्घ, प्रदेश र स्थानीय तहबीचको सम्बन्ध सुदृढ भए मात्र विकास र समृद्धिको लक्ष्य हासिल गर्न सकिने बताएका छन् ।

आज कर्णाली प्रदेश प्रशिक्षण प्रतिष्ठानको परिषद्को तेस्रो बैठकलाई सम्बोधन गर्दै मुख्यमन्त्री कँडेलले तीनै तहबीच सहकार्य र समन्वयलाई मजबुत बनाउनुपर्नेमा जोड दिए । उनका अनुसार, सङ्घ र प्रदेशले नीति तथा योजना बनाए पनि कार्यान्वयनको वास्तविक स्थान स्थानीय तह भएकाले त्यसलाई सक्षम र जिम्मेवार बनाउन आवश्यक छ ।

मुख्यमन्त्री कँडेलले सीमित स्रोत साधनको सदुपयोग गर्नुपर्नेमा जोड दिंदै समस्या मात्र देखाउने होइन, समाधानका व्यवहारिक उपाय खोज्ने प्रवृत्ति विकास गर्नुपर्ने धारणा राखे । उनले विधि, कानुन र पारदर्शिताको पालना गर्दै विभेदरहित काम गर्न सबैलाई आग्रह समेत गरे ।

उनले सङ्घीय व्यवस्थालाई प्रभावकारी बनाउन कानुनी स्पष्टता र प्रक्रियागत पारदर्शिता अपरिहार्य रहेको बताए ।